Os colectivos de memoria piden á Xunta e ao Goberno que impulsen a protección do antigo cárcere de Ourense
Tres colectivos de memoria histórica da provincia de Ourense solicitaron reunións co subdelegado do Goberno e co delegado territorial da Xunta para presentarlles a súa proposta de recuperación do antigo cárcere provincial. A iniciativa busca que se inicien os procedementos para declarar o inmoble Lugar de Memoria, por parte do Estado, e Ben de Interese Cultural (BIC), por parte da Administración autonómica.
As peticións foron remitidas por carta por Amigos da República de Ourense, o Comité pola Memoria Histórica do Val do Limia e o Comité de Memoria Histórica da Comarca de Celanova. As entidades tamén fan un chamamento ao conxunto do activismo pola memoria histórica da provincia para que se sume á reivindicación.
Os colectivos consideran que a apertura da fase de consulta pública do expediente para declarar o Campo de Aragón como Lugar de Memoria reforza a necesidade de incorporar o antigo cárcere a estas iniciativas de recoñecemento e protección. Argumentan que o edificio desempeñou un papel central na represión na cidade e na provincia, antes e durante a consolidación da Prisión Central de Celanova.
As asociacións sinalan, ademais, que o expediente relativo ao Campo de Aragón non menciona o cárcere provincial, polo que pasaron a maioría dos presos que posteriormente foron fusilados na explanada do cuartel de San Francisco. Tamén botan en falta unha referencia á Prisión Central de Celanova, mentres que si se recollen outros espazos, como Camposancos e O Cumial.
Por este motivo, defenden que se corrixa esta omisión e que ambos os lugares se incorporen ás actuacións de recuperación da memoria histórica na provincia. As entidades advirten de que a deterioración progresiva do antigo cárcere fai urxente avanzar na súa protección e rehabilitación.
A proposta, que xa fora trasladada á opinión pública e recibira o apoio do PSdeG na cidade de Ourense, pasa por impulsar as declaracións oficiais correspondentes e acometer canto antes a recuperación do inmoble.