Os socialistas alertan de que o Concello de Ourense volveu a perder unha axuda para rehabilitar a antiga Prisión Provincial
A voceira do grupo municipal socialista no Concello de Ourense, Natalia González, ofreceu unha rolda de prensa diante da antiga Prisión Provincial –que padece xa 38 anos de olvido e abandono dende o seu peche e que data do século XIX– para informar de que o goberno de Gonzalo Pérez Jácome perdeu, novamente, a oportunidade de rehabilitala con fondos europeos para outros usos. “O inmoble goza da catalogación de Patrimonio polo seu valor histórico na contorna de As Burgas e durante os 6 anos de mandato que leva o alcalde anunciou e prometeu diversos usos para el”, lembrou sobre as promesas imcumpridas de convertilo nun hotel boutique, na sede da UNED, na sede da Confederación Hidrográfica Miño-Sil, nun museo con restaurante e talleres ou en oficinas municipais.
Neste senso, a socialista recordou que, en xuño de 2022, o executivo de Democracia Orensana presentaba á convocatoria do PIREP Local 2022, un anteproxecto para optar a fondos europeos e poder convertela na nova sede da UNED, segundo afirmaban. “Mais este anteproxecto foi rexeitado porque se entendía que debería haber un proxecto en firme para optar a esa liña de axudas”, destacou a tamén secretaria xeral do PSdeG na cidade.
Uns meses despois, en xaneiro de 2023, o goberno de Jácome presentaba outro proxecto de rehabilitación para uso docente e administrativo e destinalo ao mesmo fin para situar alí a sede da UNED ou transformalo nun edificio municipal multiusos, anunciando naquel momento que se iniciarían as obras no 2024. “Presentouse o proxecto e solicitouse financiamento a través de fondos europeos do Goberno de España, pero no mes de abril o MITMA fai pública a resolución e informa da baixa puntuación do proxecto presentado polo Concello de Ourense e resolve deixando fóra da liña de axudas a nova proposta presentada”, incidiu a portavoz.
“O paso seguinte que deu o alcalde foi presentar outro proxecto de rehabilitación do antigo cárcere ao Programa do 2% Cultural, cuxos requisitos pasaban por tratarse de espazos BIC e de protección integral. A memoria, planos e orzamento, nesta ocasión, foi adxudicado a dedo por 18.000 euros a un exasesor de Democracia Orensana días antes do peche do prazo de presentación da dita convocatoria”, recorda sobre o último paso dado que tampouco foi aprobado por incumprimento de requisitos básicos e que xa non apareceu na resolución de finais do ano pasado no relativo a esta liña de financiamento.
Entre eses requisitos básicos que descartaron o proxecto está a non acreditación axeitada da declaración de BIC e a non acreditación de xeito conveniente da retención de crédito da participación orzamentaria do Concello de Ourense, segundo relatou a voceira do grupo municipal do PSdeG.
“As e os socialistas lamentamos a incapacidade e fracaso de Jácome e do seu equipo de goberno coa perda dunha nova oportunidade de axuda de Fondos Next Generation para a rehabilitación, despois de case 40 anos dende que pechou, da antiga Prisión Provincial e seguiremos apostando por recuperar este inmoble para a cidade, reinvidicando o seu valor como espazo de memoria histórica”, rematou ante os medios de comunicación.