Ourense acolle a presentación do 4º Observatorio sobre capital humano autónomo

OurenseXa
O estudo analiza o papel do traballo autónomo como motor do territorio e pon o foco na colaboración entre administracións e empresariado
4 Observatorio CEO capital humano Ourense
20 Nov 2026

A Confederación Empresarial de Ourense (CEO) presentou este xoves as conclusións do seu cuarto Observatorio sobre capital humano, un informe titulado ‘Capital humano autónomo: a forza que impulsa o territorio’, centrado no papel que desempeñan os traballadores por conta propia no desenvolvemento económico e social da provincia.

Ao acto asistiu a directora xeral de Traballo Autónomo e Economía Social da Xunta, Marta Vázquez Guzmán, quen puxo en valor esta ferramenta como instrumento útil para coñecer mellor a realidade do colectivo autónomo e deseñar medidas axustadas ás súas necesidades.

Durante a súa intervención, Vázquez Guzmán incidiu na importancia da colaboración público-privada como vía para respaldar a este sector, que contribúe de xeito directo á dinamización económica e social da provincia de Ourense.

Neste sentido, lembrou que o Goberno autonómico pon a disposición dos autónomos distintos recursos de apoio, entre eles a Rede de polos de emprendemento, unha rede composta por 15 oficinas repartidas por toda Galicia. Destas, catro localízanse na provincia de Ourense, concretamente en O Barco de Valdeorras, Baños de Molgas, O Carballiño e Verín.

Estes centros están orientados tanto a quen se atopa nunha fase inicial, cunha idea de negocio que busca desenvolver, como a aqueles profesionais que xa teñen en marcha a súa actividade e precisan apoio para consolidala.

0.14469790458679