Ourense desenvolve unha programación de actividades polo 25N baixo o lema 'Que chova igualdade'
O Concello de Ourense deu a coñecer o programa de actividades que levará a cabo con motivo do 25 de novembro, Día Internacional para a Eliminación da Violencia contra as Mulleres. Baixo o lema ‘Que chova igualdade’, a proposta reúne unha ducia de iniciativas dirixidas tanto á poboación escolar como á cidadanía en xeral, que se desenvolverán ao longo de varios días do mes.
Entre as accións programadas figura un curso de autodefensa para mulleres, que se impartirá os días 19 e 26 de novembro ás 19.00 horas no CEIP Mestre Vide. Quen desexe apuntarse pode facelo de forma presencial na sede da Concellería de Igualdade, na rúa Vasco da Ponte, número 1, baixo, ou ben por teléfono ou correo electrónico.
O consistorio tamén deseñou varias actividades pensadas para o alumnado de distintos centros educativos. Celebraranse dous escape rooms, un baixo o título ‘Rexeita o maltrato’ o 20 de novembro no CPR Divino Maestro, e outro chamado ‘Facendo visible o invisible’ o día 23 no IES Otero Pedrayo. A isto súmase unha xincana por estacións denominada ‘Alicia e o dinosauro do esquecemento’, concibida para dar a coñecer mulleres que quedaron á marxe dos relatos históricos; desenvolverase o 24 de novembro no CEIP Manuel Sueiro e no CEIP Mestre Vide, e o día 25 no CPR Divino Maestro e no CEIP Prácticas.
Un dos actos máis simbólicos será a colocación dunha placa conmemorativa en homenaxe ás Irmás Touza, que terá lugar o 24 de novembro ás 12.50 horas na estación de tren de Ourense, instalación xestionada por Adif.
A programación contempla ademais un obradoiro sobre o Centro de Información á Muller (CIMM) dirixido á igualdade, que se celebrará o 23 de novembro no CIFP A Farixa, así como un obradoiro de empoderamento feminino que se desenvolverá o 27 de novembro en distintas asociacións veciñais da cidade.
O propio 25 de novembro, ás 12.00 horas, o Salón de Plenos do Concello acollerá a lectura do manifesto institucional con motivo desta xornada. Ese mesmo día arrincará tamén a iluminación especial da ponte romana, que se manterá até o 29 de novembro. Paralelamente, o Espazo Xove albergará entre o 23 de novembro e o 2 de decembro a exposición ‘Á violencia de xénero... dille non!’.
Todas estas actividades están organizadas polo Concello de Ourense e contan cunha subvención procedente do Ministerio de Igualdade dentro do Pacto de Estado contra a Violencia de Xénero, ademais da colaboración de Adif e a Xunta de Galicia.