Ourense duplicará as xornadas de portas abertas a talleres de arte coa nova edición de 'Estudios Abertos'
Ourense prepárase para acoller unha nova edición do programa 'Estudios Abertos', un proxecto dedicado a abrir ao público os talleres e espazos de traballo de artistas contemporáneos. A iniciativa, que chega á súa terceira edición co respaldo da Xunta, medrará este ano de xeito notable: por primeira vez desenvolverase ao longo de dúas fins de semana completas de outubro, en lugar dunha soa, o que permitirá sumar ata 24 espazos e 45 creadores participantes entre a cidade e distintos puntos da provincia.
A presentación do proxecto tivo lugar este martes coa participación do director xeral de Cultura, quen puxo en valor a capacidade desta proposta para dar a coñecer tanto o lugar de traballo coma o proceso creativo de artistas galegos, xa sexan noveles ou de traxectoria consolidada. Entre as disciplinas representadas atópanse a pintura, a escultura, a ilustración, a colaxe, as artes visuais, a arte sonora, a creación conceptual, as instalacións e as intervencións no espazo urbano.
Precisamente esa diversidade de perfís e linguaxes artísticas foi un dos aspectos destacados durante a presentación, xunto coa decisión de ampliar o programa a dúas fins de semana, o que se traduce en máis espazos abertos e máis artistas ofrecendo ao público a posibilidade de coñecer de primeira man como traballan.
Dúas fins de semana, dous percorridos diferenciados
O calendario do programa organízase en dous bloques ben diferenciados. O primeiro, previsto para os días 17 e 18 de outubro, propón un percorrido pola creación artística desenvolvida en distintos concellos da provincia, entre eles Allariz, Bande, Celanova, Esgos, Taboadela, Verín e Xunqueira de Espadanedo.
A segunda quenda, que se celebrará do 23 ao 25 de outubro, trasladará o foco á propia cidade de Ourense, onde se concentrará boa parte da programación nos estudios e espazos urbanos de creación.
Rutas gratuítas con prazas limitadas
Ademais das aperturas libres dos talleres, o programa contempla a organización de rutas guiadas e gratuítas, con reserva previa e un número limitado de prazas. Segundo se explicou durante a presentación, esta fórmula busca achegar ao público aos talleres dun xeito máis pausado, favorecendo unha experiencia guiada e unha difusión máis completa tanto dos espazos coma dos artistas que os ocupan.
Neste sentido, subliñouse que o proxecto pretende romper con algúns tópicos sobre a suposta dificultade de acceso á arte contemporánea, amosando que se trata dunha disciplina próxima e aberta a distintas formas de relación co público. Tamén se destacou o valor deste tipo de iniciativas como exemplo de descentralización da programación cultural, en sintonía cos principios recollidos na Lei de cultura inclusiva e accesible de Galicia.
Continuidade de artistas e novas incorporacións
Esta terceira edición manterá a presenza de varios dos artistas que xa participaron en anos anteriores, entre eles Natasha Lelenco, Xosé Poldras e Leandro Sánchez na cidade de Ourense, así como Xabier Riomao, Ehlaba Carballo e Arturo Andrade. A eles súmanse este ano novas incorporacións de prestixio semellante, como Chus Lamas, Ramón Conde e Eva González, ampliando así o abano de propostas e estilos que o público poderá descubrir ao longo das dúas semanas de programación.