Ourense e Quimper reforzan os lazos culturais arredor da tradición nun encontro institucional na Deputación
A Deputación de Ourense recibiu este mércores a visita dunha delegación procedente da cidade francesa de Quimper, nun encontro celebrado no Pazo Provincial enmarcado na cooperación cultural que ambas localidades manteñen desde hai anos.
A xornada serviu para poñer en valor os vínculos existentes entre Galicia e Bretaña a través da cultura tradicional e do patrimonio inmaterial, ámbitos nos que ambas cidades levan tempo colaborando.
A delegación foi recibida polo director da Área de Cultura da Deputación, Marcos Vázquez, xunto aos responsables do Centro de Cultura Popular Xaquín Lorenzo, Xulio Fernández Senra e Xavier Álvarez, cos que mantiveron un encontro de carácter institucional e de intercambio de experiencias.
A colaboración entre o Centro de Cultura Popular Xaquín Lorenzo e diferentes entidades culturais de Quimper consolidouse nos últimos anos mediante exposicións, conferencias, obradoiros e actividades divulgativas centradas no patrimonio etnográfico, a cultura tradicional e o Camiño de Santiago.