Ourense prepara o acceso ao Parque de Montealegre para a observación da eclipse solar do 12 de agosto
O Concello de Ourense facilitará desde este luns, 10 de agosto, as entradas e as lentes de protección homologadas ás persoas que xa teñen confirmada a súa inscrición para asistir á observación da eclipse solar do mércores 12 de agosto no Parque de Montealegre. A actividade comezará ás 19.30 horas e conta coa colaboración da Asociación Astronómica de Ourense.
As persoas inscritas poderán retirar o material na Oficina de Turismo do Concello, situada na Praza de San Martiño, entre o luns 10 e o mércores 12 de agosto, en horario de 9.00 a 14.00 horas. Para facelo deberán facilitar o código de inscrición que recibiron por correo electrónico da organización.
Tamén será posible recoller as entradas e as lentes o propio mércores pola tarde, tanto nas proximidades do aparcamento do Auditorio como no acceso ao Parque de Montealegre.
Para facilitar os desprazamentos ata o lugar da actividade, o Concello habilitará un dispositivo especial de mobilidade e recomenda utilizar o transporte público. Entre as medidas previstas figura un autobús lanzadeira gratuíto, con saída desde a rúa da Canle, 4, no Auditorio. O servizo de subida funcionará entre as 20.00 e as 21.00 horas, mentres que os regresos están previstos entre as 21.00 e as 22.00 horas.
Ademais, o aparcamento do Auditorio será gratuíto e permanecerá dispoñible ata o seu peche, ás 00.00 horas.
En materia de circulación, establecerase sentido único entre as 20.00 e as 23.00 horas desde a Fonte dos Caños ata o cruzamento do Camiño Rapazes con Montealegre.
O Concello lembra tamén as normas de seguridade que deberán cumprir as persoas asistentes. Durante as fases parciais da eclipse será obrigatorio utilizar lentes homologadas para a observación solar.
A idade mínima para acceder á actividade será de seis anos e os menores deberán estar acompañados en todo momento por unha persoa adulta. Así mesmo, recoméndase evitar camiñar mentres se mira ao ceo, respectar a sinalización das zonas restrinxidas e seguir as indicacións da organización.
As persoas participantes deberán tamén contribuír ao coidado da contorna natural do Parque Botánico de Montealegre.