Pereiro de Aguiar acolleu unha xornada de formación especializada en emerxencias sanitarias
O auditorio de Os Gozos foi escenario dunha nova actividade formativa dirixida a profesionais do ámbito sanitario coa celebración dun curso centrado na atención avanzada a pacientes en situación crítica.
A iniciativa, organizada por FORSAGAL, reuniu persoal médico e de enfermaría procedente de diferentes ámbitos asistenciais, entre eles atención primaria, servizos de emerxencias e hospitais. O obxectivo da formación foi actualizar coñecementos e mellorar a capacidade de resposta ante situacións cardiotraumatolóxicas complexas.
Ao longo da xornada desenvolvéronse sesións prácticas e teóricas relacionadas co soporte vital avanzado, un ámbito fundamental na asistencia urxente e na coordinación dos equipos sanitarios.
A organización destacou a boa resposta dos participantes e a adecuación das instalacións municipais para este tipo de actividades formativas. Ademais, profesionais chegados desde outros puntos de Galicia valoraron positivamente tanto o desenvolvemento do curso como o ambiente de traballo xerado durante a actividade.