Sociedade

A veciñanza empadroada pode recoller ata dúas unidades por persoa nas oficinas municipais a partir deste venres e ata esgotar existencias

O Concello do Pereiro de Aguiar inicia este venres, 7 de agosto, o reparto de lentes de protección homologadas para que a veciñanza poida seguir con seguridade a eclipse solar do 12 de agosto.

A iniciativa permitirá distribuír un total de 500 lentes entre as persoas empadroadas no municipio. A entrega realízase nas oficinas municipais desde as 9.30 horas e manterase ata esgotar as existencias dispoñibles.

Cada persoa poderá retirar un máximo de dúas unidades, co obxectivo de facilitar o acceso ao maior número posible de veciños.

Desde o Concello lembran a importancia de empregar unicamente lentes homologadas para a observación directa do Sol, advertindo de que utilizar protección non adecuada pode provocar danos graves na visión durante o eclipse.