Persoal de INDEA mobilízase en Ourense tras o despedimento dunha traballadora por lesión laboral
Persoal da empresa de automoción INDEA, situada no polígono de Pereiro de Aguiar, concentrouse este mércores diante das instalacións para protestar polo despedimento dunha traballadora e esixir a súa reincorporación ao posto.
A mobilización foi convocada pola CIG-Industria, que sostén que a empregada, afectada por unha lesión derivada do traballo repetitivo na liña de inxección, solicitou unha adaptación das súas funcións que non foi atendida pola compañía. Segundo a central sindical, semanas despois recibiu comunicación de despedimento obxectivo por suposta ineptitude sobrevida.
Durante a protesta, as persoas participantes fixeron visible a súa reivindicación baixo o lema “enfermar non é un delito”. Desde o sindicato denuncian que a decisión empresarial supón trasladar á traballadora a responsabilidade da súa propia doenza. Neste sentido, sinalan que “Chámanlle ineptitude ao que eles mesmos fixeron: destruír a súa saúde”.
A organización sindical cualifica o ocorrido como unha práctica de “violencia laboral” e vincúlao a un contexto máis amplo de reestruturación na compañía, agora integrada no grupo SAPA. Segundo explican, a operación de absorción de empresas no sector podería derivar en cambios laborais e movementos internos que afectan ao persoal.
“O patrón é claro: SAPA absorbeu Megatech, que ten outra planta de inxección de plástico xusto en fronte de INDEA. Nos próximos meses haberá axustes de persoal, cambios de categoría e movementos entre empresas. Esta traballadora é a primeira, pero non vai ser a última se non nos opoñemos a esta política empresarial”.
Entre as demandas trasladadas na concentración figuran a readmisión inmediata da empregada despedida, a aplicación efectiva de adaptacións de posto sen consecuencias laborais negativas e o recoñecemento das lesións musculoesqueléticas derivadas de tarefas repetitivas como enfermidades profesionais. O sindicato reclama tamén garantías ante posibles procesos de reorganización interna na empresa.