Pontedeva convértese en escaparate das novas axudas para casas niño no rural galego
O rural galego conta cun novo pulo en materia de atención á primeira infancia. Segue aberto o prazo para solicitar as axudas destinadas a poñer en marcha cinco novas casas niño na comunidade, unha convocatoria dotada con máis de 300.000 euros por parte da Consellería de Política Social e Igualdade e cuxo prazo de solicitude remata o vindeiro 14 de setembro.
Grazas a esta liña de subvencións, prevese que máis de 530 nenos e nenas de entre 0 e 3 anos reciban atención nestes recursos, que funcionan once meses ao ano e oito horas diarias, garantindo un servizo gratuíto sen que as familias teñan que desprazarse fóra da súa contorna. Cada casa niño pode acoller ata cinco menores e están pensadas especificamente para concellos de menos de 5.000 habitantes.
Na actualidade, Galicia dispón dun cento de casas niño repartidas pola súa xeografía, un modelo que arrincou en 2016 co obxectivo de equiparar as oportunidades das familias do rural coas das zonas urbanas. O investimento acumulado do Goberno galego neste programa supera xa os 13,5 millóns de euros.
Estes recursos enmárcanse dentro dun paquete máis amplo de medidas de conciliación impulsadas pola administración autonómica, entre as que tamén figuran a gratuidade da educación infantil de 0 a 3 anos e o Bono Concilia Familia, unha axuda económica directa para sufragar os custos de atención nos períodos non lectivos.
Na provincia de Ourense, a rede ascende actualmente a 49 casas niño, distribuídas entre concellos como Amoeiro, Baños de Molgas, Beade, Carballeda de Avia, Castrelo de Miño, Castrelo do Val, Cenlle, Cortegada, Cualedro, Entrimo, A Gudiña, O Irixo, Larouco, Laza, Leiro, Lobios, Manzaneda, Maside, A Mezquita, Montederramo, Monterrei, Os Blancos, Padrenda, Petín, Piñor, Pontedeva, Porqueira, Punxín, Rairiz de Veiga, San Amaro, Sarreaus, Taboadela, Trasmiras, A Veiga, Verea, Vilar de Barrio, Vilardevós e Xunqueira de Espadanedo.
A presentación desta convocatoria tivo lugar durante unha visita á casa niño Raíces e Brotes de Pontedeva, na que o delegado territorial da Xunta en Ourense, Manuel Pardo, estivo acompañado polo alcalde do Concello, Juan Carlos González.