Preto de 400 propietarios reciben os títulos da parcelaria da Graña, en Xunqueira de Ambía
A conselleira do Medio Rural, María José Gómez, acompañada pola directora xeral de Desenvolvemento Rural, Paz Rodríguez, polo delegado territorial da Xunta en Ourense, Manuel Pardo, e polo alcalde de Xunqueira de Ambía, José Luis Gavilanes, presidiu esta mañá o acto de entrega de títulos de propiedade da concentración parcelaria da Graña, neste municipio ourensán.
Este proceso abrangue unha superficie de 413 hectáreas e beneficia un total de 387 propietarios. Mediante o seu desenvolvemento, pasouse de máis de 4.300 parcelas a 848, cunha superficie media dos predios que se ampliou desde os 813 aos preto de 4.000 m² e cun investimento total, por parte da Xunta, de preto de dous millóns de euros. Estes fondos propiciaron, entre outras actuacións, a realización dunha rede de camiños que supera lixeiramente os 21 quilómetros.
A conselleira do Medio Rural puxo en valor estes datos, así como o feito de que o termo municipal de Xunqueira de Ambía teña xa concentrado case o 37% do seu territorio. Ademais, María José Gómez felicitou os propietarios por recibiren os seus títulos e subliñou que, a través das parcelarias, contribúese a paliar o minifundismo, á vez que se procura reducir e reverter o abandono das terras produtivas, mellorando as condicións de desenvolvemento das actividades agrícolas, gandeiras e forestais.
Nesta mesma liña, a titular de Medio Rural afirmou tamén que a Xunta continúa apostando polos procesos de concentración parcelaria para incrementar o valor das terras, á vez que aumenta a base territorial das explotacións e se reducen os seus custos de produción.
Oito anos de espera
Dende o BNG de Xunqueira de Ambía celebran a recepción de títulos por parte de todos os propietarios e propietarias da zona da Graña, pero lamentan os retrasos neste proceso. Dende a formación nacionalista en Xunqueira de Ambía lembran que a concentración parcelaria rematou en 2016, pero que os títulos demoráronse ata o día de hoxe, oito anos despois. Iso si, poñen en valor este proceso que “permitirá unha mellor ordenación das terras e facilitará o traballo das nosas explotacións agrarias”.