Quins celebra esta fin de semana as súas festas en honra a Santa María e San Roque
A parroquia de Quins, no Concello de Melón, prepárase para vivir as súas festas patronais en honra a Santa María e San Roque, que se celebrarán do 14 ao 16 de agosto de 2026 cunha programación que combina actos relixiosos, musicais e de lecer para todos os públicos.
Os festexos arrancarán o venres 14 de agosto cunha proposta teatral: ás 22.00 horas representarase 'Neura, unha comedia neurofestiva', que dará o pistoletazo de saída a unha fin de semana chea de actividade.
O sábado 15 comezará cedo, cun pasarrúas ás 10.30 horas a cargo da Charanga Europa, que animará as rúas antes da misa solemne con procesión prevista para as 12.00 horas. A continuación terá lugar a tradicional sesión vermú, tamén amenizada pola Charanga Europa. Xa pola noite, a partir das 23.00 horas, a verbena contará coas actuacións de Dr. Slump e DJ Rafa Radio.
O domingo 16 de agosto seguirá un esquema semellante: pasarrúas coa Charanga Europa ás 10:30, misa con procesión ás 12.00 e nova sesión vermú. Para pechar as festas, desde as 23.00 horas subirá ao escenario a orquestra Panamá, xunto coa actuación de Los Lunes al Sol.
Con esta programación, o Concello de Melón convida a veciños e visitantes a gozar dunhas festas que combinan tradición, devoción popular e ambiente festivo nunha das parroquias do municipio.