Rematan as obras de mellora da cuberta do pavillón do IES de Allariz
O pavillón deportivo do IES de Allariz conta xa cunha cuberta renovada despois da actuación executada pola Consellería de Educación, Ciencia, Universidades e Formación Profesional durante a pasada semana. A intervención responde ás peticións formuladas nos últimos meses tanto pola dirección do centro educativo como polo Concello, que viñan reclamando solucións para os problemas de conservación que presentaba o edificio.
Os traballos centráronse na reparación da parte superior da instalación, permitindo corrixir as deficiencias detectadas e mellorar a impermeabilización da cuberta. Deste xeito, solucionáronse as filtracións de auga que afectaban ao pavillón, incrementando as condicións de seguridade, funcionalidade e conservación dun equipamento de uso diario para a comunidade educativa.
Desde o Concello destacan que esta actuación supón un paso importante para garantir un mellor estado das instalacións, aínda que lembran que continúan existindo outras necesidades pendentes. Entre elas figuran a renovación dos aseos e a recuperación do sistema de produción de auga quente sanitaria, actuacións que consideran necesarias para ofrecer un servizo acorde ás necesidades das persoas usuarias.
O pavillón do IES de Allariz non só é empregado polo alumnado durante a actividade lectiva, senón que tamén acolle adestramentos e competicións de diferentes clubs, asociacións e colectivos deportivos fóra do horario escolar, polo que as melloras repercuten nun amplo número de usuarios.
O Goberno local agradeceu a resposta da Consellería á demanda formulada de maneira conxunta co centro educativo e asegurou que continuará realizando un seguimento das necesidades desta infraestrutura. O obxectivo, sinalan, é seguir impulsando novas actuacións que permitan manter unhas instalacións modernas, seguras e adaptadas ao uso que reciben ao longo de todo o ano.