Renfe aumenta máis dun 24% a oferta diaria de Media Distancia no Eixo Atlántico a partir do 15 de outubro
Renfe reforzará a partir do próximo 15 de outubro a oferta ferroviaria no Eixo Atlántico coa posta en marcha do ‘Plan Galicia’, unha actuación coa que a compañía pretende mellorar a mobilidade dos usuarios habituais dos servizos de Media Distancia entre Vigo, Santiago e A Coruña e dos Avant entre Ourense, Santiago e A Coruña. A nova programación permitirá incrementar en máis dun 24% as prazas dispoñibles nas conexións do Eixo Atlántico e nun 6% a oferta dos servizos Avant.
O plan inclúe novos servizos, a incorporación de trens con maior capacidade e diversos axustes horarios para reforzar a oferta nas horas e días de maior demanda, especialmente nos desprazamentos diarios por motivos laborais, académicos ou persoais. Os billetes correspondentes á nova programación estarán dispoñibles nas próximas horas nos canais habituais de Renfe.
No Eixo Atlántico, o servizo 9073 entre A Coruña e Vigo, con saída ás 7.00 horas, pasará a realizarse con material S106, con máis de 500 prazas por tren, para incrementar a oferta nas primeiras horas da mañá. Ademais, Renfe creará un novo servizo entre Vigo Urzáiz e A Coruña ás 9.00 horas, tamén con máis de 500 prazas.
Os servizos 9123 A Coruña-Vigo Urzáiz e 9132 Vigo Urzáiz-A Coruña tamén pasarán a utilizar material S106 e modificarán os seus horarios, con saídas ás 11.30 e ás 13.15 horas, respectivamente. Pola súa banda, o tren 9083 A Coruña-Vigo Urzáiz, con saída ás 8.00 horas, aumentará a súa capacidade ao circular en dobre composición.
Renfe tamén aproveitará a conexión co AVE 4464, que sae de Vigo ás 6.00 horas con destino a Madrid, para ofrecer prazas de Media Distancia entre Vigo e Santiago e reforzar así a oferta nas primeiras horas do día.
Outra das novidades será a creación dun novo servizo entre A Coruña e Vigo Urzáiz ás 20.00 horas, co obxectivo de ampliar as opcións de mobilidade durante a tarde-noite e facilitar os desprazamentos de regreso.
Cambios nos horarios e reforzos durante o inverno
A compañía tamén realizará modificacións nos horarios de dous servizos do Eixo Atlántico. O 9113 A Coruña-Vigo Urzáiz adiantará a súa saída ás 10.30 horas, mentres que o 9213 A Coruña-Vigo Urzáiz pasará a saír ás 22.05 horas, fronte ás 21.40 actuais.
Esta reorganización permitirá atender os usuarios dos servizos rexionais 12560 e 12561, que conectan A Coruña e Santiago a última hora, polo que estes dous trens deixarán de circular.
Renfe manterá ademais os reforzos en dobre composición que xa se aplicaron durante a pasada temporada de inverno nos servizos 9072 Vigo Urzáiz-A Coruña, 9112 Vigo Urzáiz-A Coruña e 9153 A Coruña-Vigo Urzáiz. Estes trens seguirán ofrecendo 564 prazas fronte ás 282 actuais.
No corredor entre A Coruña e Vigo Guixar tamén se introducirán pequenos axustes nos horarios dos servizos rexionais que circulan pola liña convencional. Segundo Renfe, estes cambios permitirán adaptar as circulacións aos tempos reais de viaxe e favorecer unha maior puntualidade.
No caso dos servizos Avant entre Ourense, Santiago e A Coruña, Renfe aproveitará a capacidade dispoñible nalgúns trens AVE para incorporar novas prazas, tanto nos horarios de mañá como de tarde.
A medida supón engadir tres novas relacións á operativa xa existente en determinados trens de Alta Velocidade e permitirá incorporar 5.400 prazas adicionais semanais para os usuarios habituais dos percorridos internos en Galicia.
Os billetes da nova oferta poderán consultarse e adquirirse nas próximas horas nas canles habituais de Renfe, entre elas as billeteiras, as máquinas de venda automática, a aplicación Renfe, o teléfono 912 320 320 e a súa páxina web.