Ribadavia prepárase para vibrar mañá co son do theremín no Museo do Viño
A conta atrás está a piques de rematar. Este xoves, Ribadavia acollerá unha nova cita coa música nun contorno pouco habitual: o Museo do Viño de Galicia, que ás 21.00 horas abrirá as súas portas para a sexta edición da Cata Sonora, o ciclo que fusiona experiencia sonora e patrimonio vitivinícola na localidade.
O protagonista desta xornada será o músico Paulo Pascual, que subirá ao escenario co seu espectáculo 'Theremin e complementos'. A proposta xira arredor deste singular instrumento electrónico, que se toca sen contacto físico, unicamente co movemento das mans no aire, o que o converte nun dos dispositivos musicais máis peculiares e menos frecuentes sobre os escenarios.
Con esta sexta entrega, a Cata Sonora afiánzase como unha cita xa habitual do verán cultural ribadaviense, aproveitando o Museo do Viño tanto como espazo expositivo dedicado ao mundo do viño como escenario para propostas artísticas de distinta natureza.