Ribeiro LandArt celebra o Ciclo Nacional de Cine e Mulleres Rurais en Leiro
O espazo de creación Ribeiro LandArt foi escollido como unha das sedes do Ciclo Nacional de Cine e Mulleres Rurais, unha iniciativa que chega á súa novena edición e que se celebrará en Leiro o vindeiro fin de semana do 16 e 17 de outubro.
A actividade comezará o venres 16 de outubro no Local da Entidade Menor Local de Berán, con entrada de balde ata completar o aforo. A xornada arrincará ás 20.00 horas cunha presentación a cargo da actriz e directora de cine Ana Asensio, vinculada a este proxecto cultural. Ás 20.15 horas terá lugar unha táboa redonda baixo o título 'Mulleres Vitícolas de Berán', na que participarán mulleres dedicadas ao cultivo da viña na zona. O acto pechará ás 20.30 horas coa proxección da película 'Bodegón con fantasmas', escrita e dirixida por Enrique Buleo, unha traxicomedia rural centrada nas dificultades da vida cotiá e na forma de afrontar a morte. A cinta, incluída na Selección Oficial do Festival de Sitges 2024, recibiu eloxios de medios especializados que destacaron o seu ton á vez ácido, divertido e entrañable, así como a calidade do seu guión.
Segundo explicou a organización, esta primeira xornada completarase con outras actividades paralelas ao longo do fin de semana. O sábado está prevista unha exposición fotográfica procedente do arquivo do Museo Etnolóxico de Ribadavia, coincidindo coa proxección dunha segunda película, ademais dunha visita pola tarde á mostra de Ángeles Jorreto en Cuñas Davia, onde se proxectará unha terceira longametraxe. O ciclo pecharase o domingo cun encontro e unha charla no Museo do Viño de Galicia.
Todas as actividades terán entrada de balde ata completar o aforo dispoñible en cada espazo.