'Rockeros Solidarios' reunirá a máis de 50 músicos no Auditorio Municipal de Ourense a beneficio da loita contra o cancro
O Auditorio Municipal de Ourense acollerá o vindeiro sábado 10 de outubro o concerto benéfico 'Rockeros Solidarios', unha iniciativa que reunirá sobre o escenario a máis dun cincuenta de músicos en directo. O evento está organizado por Amoeiro Rincón e conta coa colaboración do Concello de Ourense.
A proposta inspírase no formato internacional coñecido como Rockin'1000, caracterizado por reunir a un elevado número de intérpretes para ofrecer versións de grandes clásicos do rock de forma conxunta. Neste caso, a cita ourensá xuntará a máis de 50 músicos que tocarán xuntos enriba das táboas do auditorio local.
O obxectivo da cita non é só musical, senón tamén solidario: toda a recadación obtida coa venda de entradas destinarase á Asociación Española Contra o Cancro (AECC) de Ourense, entidade que presta apoio a persoas afectadas por esta enfermidade e ás súas familias.
En canto aos horarios, as portas do recinto abrirán ás 19.30 horas, mentres que o concerto comezará ás 20.00 horas. As entradas teñen un prezo de 10 euros e xa poden mercarse a través da plataforma de venda en liña ataquilla.com.
Con esta iniciativa, os organizadores buscan combinar unha noite de música en directo cunha causa benéfica, convidando á cidadanía ourensá a gozar do espectáculo mentres contribúe a unha causa social.