San Amaro celebra a quinta edición do seu Festival Celta con música, recreacións históricas e gastronomía no Castro de San Cibrao de Las
O Concello de San Amaro confirma a celebración, o vindeiro sábado 5 de setembro, da quinta edición do Festival Celta, unha das citas culturais máis sinaladas do calendario local. O evento terá como escenario o Castro de San Cibrao de Las, un xacemento arqueolóxico de gran valor patrimonial que, durante toda unha xornada, recuperará o pulso da vida castrexa a través de recreacións históricas, actividades participativas e propostas musicais e gastronómicas.
Con esta nova edición, o festival consolida o seu propósito de achegar a veciños e visitantes o legado dos antigos poboadores do castro, combinando a divulgación histórica cun ambiente festivo pensado para todos os públicos. A programación, que se desenvolverá de xeito ininterrompido dende o mediodía ata ben entrada a noite, incluirá obradoiros de oficios tradicionais, representacións de loita castrexa, actividades infantís e actuacións musicais, entre elas a da artista Uxía Pedreira, ademais dos concertos nocturnos de Acordeireta e Os Melidaos.
A organización destaca especialmente o intre do solpor, cando a croa do castro acollerá unha oración celta e un canto primal, nun dos momentos máis simbólicos da xornada. O festival contará ademais coa presenza constante da compañía Dar Trela Teatro, encargada de ambientar e dinamizar o recinto durante toda a xornada.