San Cibrao das Viñas abre as inscricións da Aula Concilia para o curso 2026/2027
O Concello de San Cibrao das Viñas abre desde este luns e ata o 20 de agosto o prazo de inscrición para a Aula Concilia correspondente ao curso 2026/2027, un servizo gratuíto destinado a favorecer a conciliación da vida laboral e familiar.
O programa está dirixido a familias con dificultades para compatibilizar os horarios de traballo co coidado dos seus fillos e fillas e atenderá a menores con idades comprendidas entre os 3 e os 14 anos.
A Aula Concilia desenvolverase de luns a venres, en horario de 15.00 a 20.00 horas, ofrecendo un espazo de atención e actividades durante as tardes.
As solicitudes poderán presentarse tanto a través da sede electrónica como de maneira presencial nas oficinas do Concello.
Para acceder ao servizo será necesario que o menor ou, polo menos, un dos seus proxenitores estea empadroado no Concello de San Cibrao das Viñas.