San Cibrao das Viñas celebra o éxito do FETSA 2026
O Local Social de Ponte Noalla acolleu esta fin de semana unha nova edición do FETSA 2026, o segundo Festival da Escola de Teatro de San Cibrao das Viñas, nunha xornada marcada pola creatividade e a participación dos distintos grupos da escola.
Ao longo da tarde do sábado, o escenario converteuse nun espazo de improvisación no que alumnado de diferentes idades, desde os máis pequenos ata persoas adultas, deu vida a diversas escenas creadas a partir de propostas sorpresa. As representacións deron lugar a situacións variadas, con historias que incluíron romances inesperados, escenas circenses, festas, atracos ficticios e outras propostas que puxeron a proba a capacidade de improvisación dos participantes.
O público asistente puido gozar dunha sesión chea de humor e espontaneidade, na que se puxo de manifesto o papel do teatro como ferramenta de expresión, comunicación e convivencia.
Desde a organización destacouse a boa acollida desta actividade, que reuniu participantes e veciñanza nun ambiente lúdico e participativo, pensado para compartir unha tarde de lecer e creatividade colectiva.