San Cibrao das Viñas dá luz verde definitiva á urbanización do polígono de Reboredo
O Concello de San Cibrao das Viñas deu o paso definitivo para poñer en marcha a urbanización do polígono P-6.1, situado na área de reparto AR-6, no núcleo de Reboredo. A Xunta de Goberno Local aprobou de forma definitiva, nunha sesión celebrada o 24 de setembro, o proxecto de urbanización que porá en marcha o plan especial de infraestruturas e dotacións deseñado para esta zona.
O documento foi redactado polo Grupo de Inversión de Desarrollo Dayhe, S.L., aínda que a iniciativa parte do propio Concello. A aprobación incorpora, ademais, unha serie de condicións fixadas polo Comisionado de Augas da Confederación Hidrográfica do Miño-Sil, organismo que debeu dar o seu visto e prace aos aspectos relacionados coa xestión da auga antes de que o proxecto puidese seguir adiante.
Con esta decisión, o Concello culmina a tramitación dun expediente que permitirá dotar a esta parte de Reboredo das infraestruturas necesarias para o seu desenvolvemento urbanístico, un paso que resulta imprescindible antes de que poidan executarse as obras de urbanización propiamente ditas no polígono.
O acordo xa foi notificado ás persoas interesadas e fíxose público para xeral coñecemento, estando tamén dispoñible na sede electrónica municipal.