San Cristovo de Cea acollerá o 27 de outubro unha xornada sobre trámites e certificado dixital
O Concello de San Cristovo de Cea acollerá o vindeiro martes 27 de outubro, ás 10.00 horas, unha xornada informativa pensada para achegar os servizos da administración aos veciños da localidade. A cita terá lugar no Edificio Multiusos de Cea.
A iniciativa xorde da colaboración entre a Subdelegación do Goberno en Ourense e o Concello de San Cristovo de Cea, co respaldo do Ministerio de Política Territorial y Función Pública, o Plan de Recuperación, Transformación e Resiliencia e a Federación Española de Municipios e Provincias (FEMP).
Durante a sesión, as persoas asistentes poderán obter no propio lugar o certificado dixital, unha ferramenta necesaria para realizar numerosos trámites tanto coa administración local como coa autonómica e a estatal. Así mesmo, ofrecerase orientación para levar a cabo xestións electrónicas frecuentes ante organismos como o Instituto Nacional da Seguridade Social (INSS), a Dirección Xeral de Tráfico, a Axencia Tributaria, o Servizo Galego de Saúde (Sergas) ou a carpeta cidadá.
A atención será personalizada e individualizada, e estará a cargo de persoal funcionario da Subdelegación do Goberno en Ourense, que se encargará de resolver as dúbidas que poidan xurdir aos participantes.
Dende a organización destacan que se trata dunha "boa oportunidade para coñecer os beneficios e as facilidades de poder tramitar e dialogar online coa administración", ao tempo que animan á cidadanía a achegarse á cita.
Para participar é necesario inscribirse previamente, ben a través do correo electrónico cultura@concellodecea.com, ben chamando ao teléfono 672 122 300. Ademais, lémbrase a quen acuda que é imprescindible levar consigo o DNI en vigor.