Teatro al Cubo chega esta tarde a Barbadás co seu espectáculo “De Vilatriste a Vilalagre”
O programa “En Barbadás o Verán é Cultura” continúa este mes de agosto cunha nova proposta teatral. Este xoves, 13 de agosto, o grupo Teatro Al Cubo levará ao Parque dos Patos de A Valenzá o espectáculo “De Vilatriste a Vilalagre”.
A representación comezará ás 21.00 horas e combinará teatro e monicreques nunha proposta dirixida tanto ao público infantil como adulto.
A obra conta a historia de Trepas, un habitante de Vilatriste que se ve envolto inesperadamente nunha aventura para salvar a localidade das fauces dun dirixente malvado. Xunto a unha singular superheroína, descubrirá unha fórmula para enfrontarse ao seu inimigo, aínda que queda por descubrir se conseguirá funcionar.
“De Vilatriste a Vilalagre” é unha creación de Teatro Al Cubo en coprodución co Centro Dramático Galego con motivo do seu 40 aniversario.
A actividade está organizada pola Concellería de Cultura de Barbadás e forma parte da programación cultural de verán do municipio.