Termatalia pecha a súa edición de 2026 con 3.000 visitantes
Termatalia 2026 pechou este venres en Expourense a súa 24ª edición despois de reunir durante dúas xornadas a 3.000 visitantes e converter o termalismo e o turismo de benestar en protagonistas dun foro internacional de debate. O VII Congreso Internacional sobre a Auga contou con medio cento de expertos procedentes de dez países, que analizaron as novas tendencias do sector e os retos aos que se enfrontan os balnearios tradicionais.
Unha das principais cuestións abordadas durante a segunda xornada foi a transformación do concepto de benestar. O descanso e a desconexión xa non son as únicas motivacións dos viaxeiros, que buscan tamén propostas relacionadas coa prevención, a natureza, a alimentación, a actividade física, a saúde mental e a lonxevidade.
O consultor, doutor en Turismo e profesor da Universidade de Girona Jaume Marín explicou que o visitante presta cada vez máis atención a como quere sentirse durante a súa viaxe e ás experiencias que quere levarse dela. Neste sentido, sinalou que “o turista xa non elixe unicamente onde ir ou que visitar; cada vez presta máis atención a como quere sentirse durante a viaxe e, sobre todo, como quere regresar. Xa non abonda con escapar da rutina: búscase regresar mellor, física e emocionalmente, e coa sensación de ter vivido algo que realmente pagou a pena”.
Segundo Marín, estas novas tendencias están xerando oportunidades para os destinos rurais e de interior capaces de combinar benestar, natureza, patrimonio e identidade local.
A aplicación da Intelixencia Artificial ao sector termal foi outra das cuestións tratadas durante a xornada. Juan Torres, desenvolvedor sénior de Negocios Internacionais, Transformación Empresarial e Dixital en Microsoft, destacou que esta tecnoloxía pode contribuír a personalizar os servizos e mellorar a toma de decisións sen substituír os elementos humanos que caracterizan o termalismo.
“A IA non substituirá a auga, o coidado profesional, a hospitalidade nin a confianza. Estes seguirán sendo os grandes activos do sector. Pero pode amplificar o seu valor, axudando a destinos e centros termais a personalizar servizos, tomar mellores decisións e traballar con maior axilidade”, afirmou. Torres defendeu así un uso da tecnoloxía orientado a conseguir un turismo termal “personalizado, eficiente e sostible”.
O congreso tamén puxo o foco no papel do termalismo como motor de desenvolvemento dos territorios nos que se sitúan os balnearios, na súa maioría vinculados ao medio rural. As sesións presenciais reuniron unhas 500 persoas, mentres que o seguimento virtual permitiu conectar con participantes de España, Portugal, Francia, Estados Unidos, México, Colombia, Perú, Brasil, Uruguai e Chile.
Durante esta edición celebrouse ademais a XXI Cata Internacional de Augas Minerais, na que foron premiadas Fontecelta, Sousas, Agua Sana, Magma Original, Cabreiroá con Gas e Bezoya.
Por outra banda, Termas de Sao Pedro do Sul e o Grupo Caldaria recibiron sendas distincións pola calidade dos seus servizos, concedidas pola Wellness & Medical Tourism World Association.