Toén impulsa un servizo público para a xestión da biomasa en tres parroquias prioritarias
O Concello de Toén activou o sistema público de xestión da biomasa nas faixas secundarias de protección das parroquias de Toén (Santa María), Moreiras (San Pedro) e Xestosa (Santa María), unha medida orientada a reforzar a prevención dos incendios forestais e facilitar o cumprimento das obrigas establecidas na normativa vixente.
A actuación enmárcase no convenio de colaboración subscrito entre a Xunta de Galicia e a empresa pública SEAGA para impulsar actuacións preventivas nas zonas consideradas prioritarias desde o punto de vista da protección fronte ao lume.
O programa está dirixido ás persoas titulares das parcelas incluídas no ámbito de actuación, que poderán adherirse ao servizo de maneira voluntaria. A través deste sistema, a Administración asumirá a execución dos traballos de limpeza e mantemento da biomasa nas faixas secundarias, contribuíndo a mellorar a seguridade das zonas próximas ás vivendas e aos núcleos de poboación.
O custo do servizo fíxase en 420 euros por hectárea e ano, o que supón, a modo orientativo, un importe anual de 42 euros para unha parcela de 1.000 metros cadrados.
Desde o Concello lembran que toda a información relativa ás parcelas afectadas, ás condicións de adhesión e ao funcionamento deste sistema público pode consultarse a través da páxina web municipal.
Con esta iniciativa, o goberno local busca favorecer unha xestión máis eficaz da biomasa, reducir o risco de incendios forestais e ofrecer ás persoas propietarias unha alternativa para cumprir coas obrigas de conservación destes terreos mediante un servizo coordinado polas administracións públicas.