Un concurso escolar sobre a Constitución reúne preto de 900 traballos en Ourense

OurenseXa
O xurado encargado de valorar as propostas presentadas xa decidiu quen serán os vinte premiados, que recollerán o seu galardón nun acto que terá lugar o vindeiro 6 de decembro no Auditorio Municipal da cidade
42ª edición do Concurso da Constitución Subdelegación de Goberno Ourense
20 Nov 2026

O xurado da 42ª edición do Concurso da Constitución, convocado pola Subdelegación do Goberno en Ourense, reuniuse para escoller os vinte traballos gañadores de entre os 873 presentados a esta convocatoria escolar, que este ano conmemora o 48 aniversario da Carta Magna.

O certame, dirixido ao alumnado de todas as etapas educativas, propuña nesta ocasión traballar sobre o contido do artigo 49 da Constitución, centrado nos dereitos das persoas con discapacidade e no impulso de políticas públicas orientadas á súa autonomía persoal e á súa plena inclusión social, con especial atención ás mulleres e aos menores nesa situación.

Á hora de valorar as propostas, o xurado tivo en conta tanto a orixinalidade e a creatividade dos traballos como a súa calidade artística e o seu grao de adecuación ao tema proposto.

Do total de participacións recibidas, 666 corresponden a debuxos presentados por alumnado de educación infantil, primaria e educación especial. Nesta categoría participaron estudantes de trece centros educativos, tanto públicos como privados, de distintos puntos da provincia.

A outra modalidade do concurso, dirixida a estudantes de ESO, bacharelato, formación profesional e universidade, resolveuse a través de fotografía e vídeo: presentáronse 188 fotografías e 19 vídeos, procedentes de alumnado de sete centros educativos.

O acto de entrega dos premios aos vinte gañadores —dez por cada unha das dúas categorías— celebrarase o vindeiro 6 de decembro, ás 12.00 horas, no Auditorio Municipal de Ourense, coincidindo coa conmemoración do Día da Constitución. No acto participarán os estudantes concursantes e premiados, as súas familias e representantes institucionais.

0.16388893127441