Un proxecto audiovisual do Carballiño logra o segundo premio de videocreación en Xuventude Crea 2026
Un creador do Carballiño foi recoñecido na modalidade de videocreación do certame Xuventude Crea 2026, impulsado pola Consellería de Cultura, Lingua e Xuventude. Trátase de Mario Fernández, autor da obra ‘Faro’, que obtivo o segundo premio nesta categoría do concurso.
O traballo premiado propón unha mirada poética e documental sobre a peregrinación ao Monte Faro, un percorrido situado entre os concellos de Chantada e Rodeiro. A través das imaxes, a peza amosa unha conexión entre o silencio, a fe e as forzas da natureza, nun relato que combina o contemplativo co espiritual.
Este recoñecemento enmárcase na final da categoría de videocreación, na que tamén resultaron premiados outros dous proxectos: ‘A pel do río’, de Alba Amoedo (A Lama), que se fixo co primeiro premio, e ‘Baixo as pálpebras’, tamén de Mario Fernández, pero vinculado neste caso á Illa de Arousa, que logrou o terceiro galardón. Así mesmo, nesta décimo sétima edición outorgouse unha Mención de Honra a José García Estévez e Isabella Moreno Rueda pola súa obra ‘Persistencia do baleiro’.
A videocreación é unha das 15 modalidades que compoñen o Xuventude Crea 2026, certame que este ano reuniu preto de medio milleiro de inscricións entre a mocidade galega. A gala final do programa celebrarase unha vez rematen as finais de todas as categorías convocadas.
Con dezasete edicións ás súas costas, Xuventude Crea consolidouse como unha referencia dentro do panorama cultural e artístico de Galicia, tendo contado ao longo da súa traxectoria coa participación de preto de 6.000 mozos e mozas e unhas 4.000 obras presentadas.