Verea estrea unha nova residencia de maiores con 24 prazas tras un investimento de 730.000 euros
O Concello de Verea conta xa cun novo Fogar Residencial de Maiores, unha infraestrutura que supuxo un investimento de 730.000 euros por parte da Xunta de Galicia. O centro dispón de 24 prazas distribuídas en 12 habitacións dobres, ademais de espazos médicos e de rehabilitación.
A esta achega autonómica súmanse 58.000 euros destinados pola Deputación de Ourense á urbanización da contorna da instalación.
A nova residencia enmárcase no Plan de investimentos da Xunta de Galicia, un acordo subscrito coa Federación Galega de Municipios e Provincias (Fegamp) e dotado con 18,5 millóns de euros procedentes de fondos NextGenerationEU, destinados ao desenvolvemento dunha vintena de proxectos no rural galego. Dentro desta estratexia, a provincia de Ourense concentra o 65 % do orzamento total —12 millóns de euros— para a creación de novas prazas residenciais e de centro de día en toda Galicia.
O proxecto preséntase como parte da folla de ruta do Goberno galego para dotar ao medio rural de equipamentos de primeiro nivel orientados a garantir o benestar das persoas maiores e contribuír a fixar poboación nestas zonas.
A instalación foi visitada por representantes do Partido Popular de Galicia, entre eles os deputados do Grupo Parlamentario Popular Cristina Campero e José Luis Ferro, a candidata do PP local, Ángeles Álvarez, e a alcaldesa da Bola e deputada provincial de Igualdade, María Teresa Barge, quen puxeron en valor a aposta autonómica polos servizos sociais nos concellos do rural ourensán.