Vilamarín inaugura esta noite as XXXVII Noites Teatrais coa estrea de 'Que veñen os americanos'
As XXXVII Noites Teatrais de Vilamarín arrancan este luns, 13 de xullo, coa estrea de Que veñen os americanos, a nova proposta do Grupo de Teatro de Vilamarín. A representación terá lugar ás 22.00 horas no Auditorio do Concello, con entrada libre ata completar o aforo.
A obra, adaptada e dirixida por Eva Tato e Galicia Gutiérrez "Gali", está protagonizada por un amplo elenco de veciñas e veciños do municipio: Iván Novoa, Pepita López, Cristina Ucha, Herminia López, Marilisa Freijedo, Tania Pérez, Alicia Cortés, Modesto Veiras, Amalia Conde, Pepita Guzmán, Consuelo Pérez, Camila Rodríguez e Maricarmen Gómez.
A comedia sitúa a acción nunha pequena vila onde a chegada dunha delegación estadounidense esperta grandes expectativas entre a veciñanza. Entre preparativos, música, situacións cómicas e numerosos enredos, o pobo enteiro mobilízase coa esperanza de que a visita traia prosperidade e un futuro mellor.
Que veñen os americanos combina humor, tenrura e sátira para ofrecer unha mirada irónica sobre os soños e ilusións dunha comunidade, converténdose na encargada de abrir unha nova edición das Noites Teatrais, unha das citas culturais máis consolidadas do verán en Vilamarín.