Xenoma Galicia inicia a próxima semana a recollida de mostras en Lugo e Cee
O proxecto Xenoma Galicia iniciará a próxima semana unha nova fase de recollida de mostras nos distritos sanitarios de Lugo e Cee, co obxectivo de avanzar na identificación do risco de desenvolver determinadas enfermidades e impulsar a prevención personalizada. As extraccións de sangue comezarán o martes 13 de outubro no Hospital Universitario Lucus Augusti (HULA), mentres que no Hospital Público Virxe da Xunqueira, en Cee, realizaranse os xoves 15 e 22.
No caso de Lugo, a toma de mostras prolongarase ata o 29 de outubro. As persoas convidadas deberán acudir con cita previa, en horario de 15:30 a 18:30 horas. Non será necesario asistir en xaxún e o persoal sanitario encargado das extraccións explicará aos participantes o procedemento do estudo.
Para esta convocatoria enviáronse aleatoriamente 1.947 mensaxes SMS en Lugo e 342 en Cee. A previsión é incorporar 457 persoas, das cales 389 corresponderán ao distrito lucense e 68 ao de Cee.
Máis de 3.100 mostras analizadas
Xenoma Galicia leva analizadas 3.112 mostras biolóxicas desde o inicio do proxecto. Desta cifra, 1.037 corresponden a mostras de sangue da primeira fase piloto, 796 a mostras de saliva da segunda pilotaxe e 1.279 a participantes dos primeiros distritos incorporados á primeira fase.
A análise destas últimas mostras permitiu identificar 25 novos resultados positivos nas patoloxías estudadas: 14 relacionados co cancro hereditario de mama e ovario, dous coa síndrome de Lynch e nove coa hipercolesterolemia familiar.
En total, o proxecto contabiliza ata o momento 53 resultados positivos. Deles, 19 proceden do piloto de sangue, nove do piloto de saliva e 25 da primeira fase. Por patoloxías, rexistráronse 30 positivos para cancro hereditario de mama e ovario, sete para a síndrome de Lynch, un caso con resultado positivo para ambas as dúas condicións e 15 para hipercolesterolemia familiar.
Un proxecto para estudar o ADN de 400.000 galegos
A recollida de mostras xa se realizou en concellos dos distritos sanitarios de Ourense, Verín, O Barco de Valdeorras, A Mariña, Monforte de Lemos, Santiago de Compostela, Barbanza, Ferrol e Vigo. A previsión é ampliar proximamente a participación aos distritos da Coruña, Pontevedra e O Salnés.
Cun investimento de 20 millóns de euros por parte da Xunta, Xenoma Galicia ten como obxectivo recompilar información xenética de 400.000 galegos. A dimensión do estudo sitúao entre os proxectos de maior envergadura deste ámbito a nivel mundial e pretende reforzar a posición de Galicia na investigación biomédica e farmacéutica.
Os datos obtidos permitirán avanzar na identificación do risco de determinadas enfermidades antes de que se manifesten, así como no desenvolvemento de tratamentos farmacolóxicos individualizados e de programas de prevención e detección temperá.
O proxecto está coordinado pola Consellería de Sanidade e dirixido polos investigadores da Fundación Pública Galega de Medicina Xenómica María Brión e Ángel Carracedo. Entre os seus obxectivos figura tamén establecer as bases dun sistema de cribado xenético sustentable e equitativo.