A Deputación de Ourense coordina coa empresa adxudicataria os traballos previos para a posta en marcha do Balneario de Berán
A Deputación de Ourense avanza nos traballos previos necesarios para a posta en marcha do Balneario de Berán, situado no Concello de Leiro. O organismo provincial mantén contactos de coordinación coa empresa adxudicataria da instalación co obxectivo de deixar encamiñados os trámites e os labores pendentes antes da súa apertura.
Neste marco, representantes da Deputación reuníronse este martes no Pazo Provincial co alcalde de Leiro e co presidente da entidade local menor de Berán para facer seguimento deste proceso. O encontro serviu para avanzar na coordinación das actuacións de adecuación que resultan necesarias de cara á reactivación do balneario.
Como resultado deste traballo conxunto, acordouse realizar unha visita ás instalacións para comprobar sobre o terreo cales son, en concreto, as intervencións que aínda deben levarse a cabo antes de que o servizo poida reabrir.
As administracións implicadas e a empresa concesionaria manterán nos vindeiros tempos os seus traballos de coordinación técnica. Dende a Deputación indicouse que se informará oportunamente da data de apertura do balneario unha vez se completen as fases previas de preparación.