A Deputación de Ourense pon a proba os protocolos de seguridade do Teatro Principal cun simulacro de emerxencia
O Teatro Principal de Ourense foi escenario este martes dun simulacro de emerxencia, unha iniciativa que se suma ao exercicio realizado a pasada semana no Pazo dos Deportes Paco Paz. Ambas as dúas actuacións enmárcanse no proceso de implantación do Plan de Autoprotección previsto para os espazos culturais de titularidade provincial.
A actividade dividiuse en dúas fases. En primeiro lugar, impartíronse sesións formativas destinadas aos traballadores do centro integrados nos equipos de evacuación. A continuación, levouse a cabo un exercicio práctico no que participaron tanto os empregados das instalacións como as persoas que se atopaban no recinto como público ou espectadores nese momento.
O operativo estivo coordinado polo Servizo de Prevención de Riscos Laborais da institución provincial e tivo como obxectivo verificar os procedementos a seguir ante unha hipotética emerxencia, ademais de dar a coñecer tanto ao persoal como aos asistentes as medidas de seguridade establecidas e os itinerarios de evacuación habilitados.
Esta xornada intégrase dentro dun calendario máis amplo de simulacros de autoprotección que a institución está a desenvolver nas súas distintas sedes, co fin de reforzar a seguridade tanto dos traballadores como da cidadanía que utiliza estes espazos.
De cara aos vindeiros meses, está previsto realizar dous novos exercicios: un no Centro Cultural Marcos Valcárcel e outro no Pazo Provincial. Ademais, entre febreiro e marzo do vindeiro ano repetiranse estes simulacros nos catro grandes centros provinciais, nesta ocasión coa participación de efectivos de Policía e Bombeiros.