A Deputación de Ourense presenta en Termatalia as súas novas liñas de termalismo social e inclusivo
Ourense volve situarse no centro do turismo de saúde a nivel internacional coa celebración da 24ª edición de Termatalia, a Feira Internacional de Turismo Termal, Saúde e Benestar. O evento regresa á cidade despois de que a súa última edición se celebrase en Colombia, e faino coa Deputación de Ourense como unha das institucións protagonistas do acto inaugural.
Durante a súa intervención, o presidente da institución provincial, Luís Menor, subliñou que este regreso supón unha oportunidade para reafirmar á provincia como referencia termal a escala global, ao contar co maior número de balnearios de España e unha das maiores concentracións de recursos termais de toda Europa.
Máis alá da súa dimensión turística, o termalismo consolidouse nos últimos anos como unha política pública cun forte compoñente social. Así o reflicten os datos do Programa de Termalismo Social da Deputación, que despois de once anos en marcha beneficiou a máis de 27.800 persoas, xerou preto de 90.000 pernoctacións e permitiu aplicar máis de 202.000 técnicas termais. A este programa sumouse recentemente o balneario de Allariz.
Baixo o lema 'Ourense sabe a termalismo. E ti, canto sabes?', a institución provincial aproveita a súa presenza na feira para dar a coñecer as novas liñas de traballo pensadas para adaptar os recursos termais ás necesidades sociais actuais. Neste sentido, lembrouse tamén a vantaxe que supón para a provincia contar con conexión de Alta Velocidade ferroviaria, un factor que reforza o seu modelo de turismo sostible e dispoñible durante todo o ano.
Un termalismo pensado para as persoas
Unha das principais novidades presentadas ten que ver co impulso de programas orientados a combater a soidade non desexada, un dos problemas sociais máis relevantes na actualidade, a través de espazos de encontro e convivencia arredor das augas termais. Xunto a esta liña, poranse en marcha tamén iniciativas específicas dirixidas a persoas con deterioro cognitivo leve, empregando o recurso termal como apoio para o coidado integral da saúde.
Dentro deste mesmo bloque enmárcase a proposta 'Termalismo con Estrelas', que combina o patrimonio natural e termal da provincia con actividades de divulgación e lecer.
Nova rede de sendeiros xunto aos balnearios
Outra das apostas presentadas en Termatalia é a consolidación da Rede de Sendeiros Azuis, unha rede de itinerarios vinculados a distintos espazos termais da provincia. Como novidade, deuse a coñecer cinco novos distintivos de calidade para rutas relacionadas cos balnearios de Arnoia, Laias (Cenlle), Lobios, O Carballiño e Ribadavia.
Estes sendeiros non só ampliarán a oferta de turismo activo na provincia, senón que terán tamén un compoñente social relevante: o seu mantemento e coidado realizarase a través dun centro especial de emprego, o que permitirá a incorporación laboral de persoas con discapacidade de forma estable.
Unha proposta tamén para o público xeral
A presenza institucional na feira complétase cunha iniciativa pensada para achegar o patrimonio hidrotermal a todos os públicos, tanto profesionais como visitantes. Trátase dunha actividade interactiva baixo o título 'Xira e descubre os misterios termais de Ourense', pensada para dar a coñecer de xeito ameno a historia e as propiedades das augas termais da provincia.
Con esta participación, a Deputación de Ourense pon en valor o termalismo non só como motor económico e turístico, senón tamén como unha ferramenta para a cohesión social, a integración laboral e o benestar da cidadanía.