A Deputación destaca a renovación do campo de fútbol de Cartelle cun investimento de 432.000 euros
O presidente da Deputación de Ourense, Luis Menor, visitou este sábado o campo de fútbol “Pau Rañado” de Cartelle para comprobar o resultado das obras de modernización realizadas nesta infraestrutura deportiva, unha actuación financiada polo organismo provincial cun investimento de 432.000 euros.
Durante a visita, na que estivo acompañado polo alcalde de Cartelle, Jaime Sousa, Menor destacou a importancia desta intervención, que cualificou de ambiciosa, e enmarcouna dentro da estratexia da Deputación para mellorar os equipamentos deportivos nos concellos do rural ourensán.
O mandatario provincial subliñou que contar con instalacións modernas e de calidade resulta fundamental para favorecer a práctica deportiva, apoiar o traballo dos clubs locais e contribuír á igualdade de oportunidades entre o medio urbano e o rural. Ademais, incidiu en que este tipo de infraestruturas tamén axudan a fomentar hábitos de vida saudables e a fixar poboación nos municipios da provincia.
As actuacións desenvolvidas no campo de fútbol incluíron a substitución do terreo de xogo mediante a instalación de céspede artificial, a renovación de distintos elementos do equipamento deportivo, a mellora dos sistemas de rego e drenaxe e a construción dunha beirarrúa perimetral arredor do recinto.
A visita coincidiu coa celebración dun encontro de fútbol entre os veteranos do RC Celta e da UD Ourense. O partido serviu como homenaxe á UDO e tamén para lembrar a figura de Pau Rañado cando se cumpre o primeiro aniversario do seu falecemento. O xogador continúa sendo unha referencia para o fútbol local e unha persoa moi recordada pola veciñanza de Cartelle.