A Deputación recoñece o esforzo de 60 deportistas ourensáns con 50.000 euros en bolsas
Un total de 60 deportistas ourensáns de 18 disciplinas diferentes recibiron as bolsas provinciais destinadas a modalidades individuais, nun acto celebrado no Pazo "A Fábrica" de Celanova. A convocatoria incrementou este ano a súa dotación ata alcanzar os 50.000 euros, reforzando así o apoio económico aos atletas da provincia.
Baixo o lema "Eu son deportista de Ourense", a entrega reuniu representantes de disciplinas moi diversas. Entre os beneficiarios figuran deportistas de piragüismo, halterofilia, bádminton, ximnasia e trampolín, ciclismo BTT, tiro olímpico, atletismo, loita, pesca, escalada, boxeo, salvamento e socorrismo, parapente, wushu, taekwondo e baile deportivo-breaking, entre outras modalidades.
O presidente da Deputación, Luis Menor, destacou durante o acto que todos eles comparten "o esforzo, a constancia e a ilusión polo deporte". Neste sentido, defendeu que as bolsas representan algo máis que unha achega económica, ao permitir tamén recoñecer publicamente os valores e o traballo que acompañan a cada carreira deportiva.
Menor puxo igualmente o foco nos sacrificios necesarios para alcanzar resultados e estendeu o recoñecemento ás familias, adestradores e clubs, aos que definiu como "o alicerce invisible pero imprescindible" dos éxitos acadados polos deportistas.
A xornada reservou tamén un espazo para homenaxear a José Luis Estévez Camiña, que recibiu o Recoñecemento á Traxectoria Deportiva. A distinción pon en valor a súa carreira no arbitraxe de baloncesto e o fito de converterse no primeiro árbitro ourensán en chegar á Liga ACB, ademais da súa condición de referente para novas xeracións.
APOIO AO DEPORTE. Durante o acto, o presidente provincial repasou tamén os investimentos realizados neste ámbito. Segundo os datos da Deputación, no actual mandato destináronse 7,2 millóns de euros á modernización e mellora dunha trintena de instalacións deportivas da provincia.
A institución destacou igualmente o alcance do programa de Fomento Deportivo, presente en 91 concellos e con máis de 6.200 participantes, así como das Copas Deputación, que mobilizan preto de 20.000 deportistas. Menor reafirmou así a aposta provincial pola actividade física como ferramenta para fomentar valores como a "convivencia, solidariedade e integración".