A Festa do Pulpo do Carballiño reforza na súa 64 edición os vínculos coa emigración galega
O Carballiño volveu converterse este domingo nun dos grandes puntos de encontro da gastronomía galega coa celebración da 64 edición da Festa do Pulpo, unha cita declarada de Interese Turístico Internacional que este ano puxo tamén o foco nos vínculos coa emigración e nas relacións históricas con Lanzarote.
O conselleiro de Emprego, Comercio e Emigración, José González, participou na celebración acompañado polo director de Turismo de Galicia, Xosé Merelles, e polo delegado territorial da Xunta en Ourense, Manuel Pardo.
Durante a súa visita, González destacou a capacidade desta festa para dinamizar a economía local e xerar actividade arredor dun dos produtos máis representativos da gastronomía galega. Neste sentido, incidiu especialmente no papel das polbeiras e dos polbeiros, cuxo oficio e experiencia permiten conservar e transmitir unha tradición estreitamente ligada á identidade do Carballiño.
A edición deste ano incorporou, ademais, unha novidade coa celebración por primeira vez do Día da Emigración. A iniciativa serviu para render homenaxe aos galegos e galegas residentes no exterior, moitos dos cales aproveitan os meses de verán para regresar aos seus lugares de orixe e participar nas festas e tradicións de Galicia.
Precisamente, a 64 edición da Festa do Pulpo está dedicada á illa de Lanzarote, unha elección coa que se pretende destacar os lazos históricos existentes entre ambos os territorios. González sinalou que a presenza de familias de orixe galega tanto nesta illa como no conxunto de Canarias contribuíu ao longo dos anos a estreitar estas relacións.
A Festa do Pulpo reafirma así o seu carácter como escaparate gastronómico e turístico, ao tempo que reivindica o traballo das persoas que manteñen vivo o oficio tradicional e serve como punto de encontro entre Galicia e a súa comunidade no exterior.