Actualidade | Turismo

A operadora ofrecerá tarifas especiais a quen acuda á cidade en tren para asistir a congresos e eventos ou para realizar escapadas e viaxes en grupo

Sinatura do convenio entre a Fundación Expourense e Renfe

Renfe e a Fundación Feiras e Exposicións de Ourense (Expourense) asinaron un acordo comercial para promover conxuntamente o turismo en Ourense da man do ferrocarril, no marco de Fitur 2025.

Este acordo, asinado polo director da área de negocio de Alta Velocidade e Outros Servizos Comerciais de Renfe, Javier Pérez López, e o director xerente de Expourense, Rogelio Martínez González, ten como finalidade a promoción das viaxes en tren, xa sexa por turismo ou por negocios, á cidade termal.

Renfe ofrecerá a todos os asistentes e expositores dos eventos organizados por Expourense un 10 % de desconto sobre o prezo de venda no momento da compra, en calquera das opcións dispoñibles (Básico, Elixe e Elixe Confort) en billetes de ida, ou ida e volta, nos trens de AVE e Longa Distancia. Esta oferta será válida para congresos ou eventos que reúnan máis de 75 persoas que utilicen o tren nos seus desprazamentos.

Ademais, poderán beneficiarse de descontos non inferiores ao 10 % os viaxeiros que contraten as súas escapadas temáticas, de turismo MICE (Meetings, Incentivos, Convencións, Eventos e Congresos) e grupos.