Actualidade

As primeiras afeccións ao tráfico comezarán ás 08:30 horas co peche da glorieta da Policía Nacional en dirección á avenida de Otero Pedrayo, onde se instalarán a saída e a meta.

A III edición da Carreira Solidaria Ruta 091, organizada pola Policía Nacional, provocará este domingo 10 de maio diversas restricións de tráfico no centro de Ourense durante a mañá.

O dispositivo especial de seguridade, coordinado pola Policía Local, activarase para garantir o desenvolvemento seguro das dúas probas previstas: a carreira de adultos, con saída ás 10:30 horas, e a modalidade infantil e inclusiva, que comezará ás 11:30 horas.

As primeiras afeccións ao tráfico iniciaranse ás 08:30 horas co peche da glorieta da Policía Nacional en dirección á avenida de Otero Pedrayo, onde se instalarán a saída e a meta. Nese punto, os vehículos que accedan desde Ponte Nova cara ao centro serán desviados por Curros Enríquez, mentres que os que circulen en sentido contrario deberán optar por Celso Emilio Ferreiro ou Sáenz Díez.

A partir das 09:30 horas pecharase completamente a rúa Curros Enríquez, xunto con todos os seus accesos. Desde as 10:00 horas iranse cortando o resto das vías do percorrido ata a finalización da proba.

A carreira de adultos partirá desde a glorieta da Policía Nacional e percorrerá distintas rúas céntricas como Curros Enríquez, Sáenz Díez, Praza de Concepción Arenal, Progreso, Bon Home, Xosé Ramón Fernández Oxea, rúa de Lugo, O Vilar, Praza da Ferrería, Cervantes, Barreira, Praza Maior, Lamas Carvajal, O Paseo e o Parque de San Lázaro, antes de regresar ao punto de saída.

No caso da proba infantil e inclusiva, o percorrido será máis reducido, desenvolvéndose entre a glorieta da Policía Nacional, Curros Enríquez e o Parque de San Lázaro.