A Noite Meiga de Ribadavia ultima os preparativos para a súa gran cita do venres
Ribadavia volverá converterse no escenario da Noite Meiga, unha das citas máis esperadas do calendario festivo do Ribeiro. Este venres 31 de outubro, a localidade despregará un amplo programa que combina propostas para todos os públicos, desde actividades infantís ata espectáculos nocturnos de ambientación terrorífica.
Antes de chegar á gran noite, o municipio xa vive o ambiente do Samaín con dúas exposicións abertas: na Praza de Abastos pode verse, ata o 1 de novembro, unha mostra de cabazas talladas elaboradas polo alumnado do CRA Amencer e do CEIP Plurilingüe de Ribadavia, mentres que o Café Bar Aljama expón os carteis presentados ao concurso deste ano.
Entre as propostas máis novidosas figura 'O Roubo da Coroa', un escape room que se desenvolverá os días 30 e 31 de outubro na Igrexa da Madalena, con pases ás 16.00, 17.45, 19.45, 21.30 e 23.15 horas, ao prezo de 15 euros por entrada.
A tarde do venres será especialmente intensa. Desde as 17.00 horas, a Praza Maior e a Rúa Progreso acollerán propostas simultáneas: o Mercado Meigo instalarase na Rúa Progreso, mentres que a Praza Maior concentrará a Procura Meiga, a Escola Feiticeiras/os —con animación musical de Abelo Valis e a presenza do Gran Dragón e do Esqueleto Eustaquio—, o posto 'Activa-T' cos seus Cadeliños e Apócemas, e as instalacións 'O Espírito dos Medos' e 'O Espello das Meigas', este último un fotomatón temático.
Ás 18.00 horas arrincará 'A Marcha dos Esqueletos', espectáculo itinerante de Zeltia Eventos desde a Praza Maior. Media hora despois, ás 18.30 horas, o Auditorio da Casa da Cultura acollerá o mago Xulio Merino, cunha entrada de 3 euros. A tarde pecharase ás 19.00 horas coa actuación das Pandereteiras da Istoria na Praza Maior.
Coa chegada da noite, ás 20.00 horas partirá desde a Ponte San Francisco o Desfile Meigo, cos Xigantes de Ribadavia, os Cabezudiños, o Esqueleto Eustaquio, o Gran Dragón, os Tabaleiros da Istoria, 'Ollos do Terror' e outras comparsas. Nesa mesma hora e ata a medianoite, o Castelo dos Sarmiento —con acceso polo edificio do Xulgado, na Praza Maior— acollerá 'Pasaxe do Terror: As Sombras da Istoria', cunha entrada de 7 euros, aforo limitado e acceso restrinxido a maiores de 12 anos. As entradas, cuxa venda anticipada se abriu o día 23 a través de Anube Descanso, tamén se poderán adquirir o mesmo día do evento desde as 16.30 horas na oficina do MIT, cun máximo de catro por persoa.
O programa nocturno continuará coa danza 'Donas sen Cabaleiros' ás 20.50 horas e a actuación de Festicultores ás 21.00 horas, ambas as dúas na Praza Maior. Ás 22.15 horas, a fachada do castelo será escenario do espectáculo 'Fulgor', tamén de Zeltia Eventos. Pasadas as 23.00 horas, os Tabaleiros da Istoria percorrerán as rúas de Ribadavia e terá lugar 'Alerta Zombi', outro pasarrúas con saída desde a Praza Maior, mentres que ás 23.15 horas Festicultores repetirá a súa actuación.
A xornada encamiñarase cara ao seu peche coa tradicional queimada, que ás 00.30 horas percorrerá o traxecto desde a saída da Madalena ata o castelo, amenizada por 'As Lajartas'. Xa na madrugada, á 01.00 horas, o Club Artístico acollerá a sesión de 'DJ Meneo' que porá o ramo final á celebración.
Para quen non acuda disfrazado de meiga, bruxo ou outro personaxe fantástico, a organización suxire vestir de cor negra, un xesto simbólico para "afastar os malos espíritos". Na Praza Maior haberá un punto de información baixo o nome 'Activa-T' para resolver dúbidas durante toda a xornada.