A rúa do Xílgaro, na Carballeira, cortará o seu tráfico este domingo pola carreira popular
A disputa dunha nova carreira popular, encadrada dentro do 'Circuíto Correndo por Ourense', obrigará a establecer cortes e restricións de circulación en distintas rúas do barrio da Carballeira o vindeiro domingo, 18 de outubro.
O dispositivo de tráfico comezará ás 08.00 horas, momento no que se cortará a circulación na rúa do Xílgaro para permitir a montaxe das estruturas de saída, meta e podio. Máis tarde, ás 10.30 horas, o peche estenderase ao resto do percorrido, que discorre pola Praza da Lexión e as rúas Castelo Ramiro, Hórreo, Paspallás, Salto do Can e Rula.
A proba deportiva comezará ás 11.00 horas coa categoría Pitufos. A continuación, ás 11.05 horas sairán os corredores das categorías Sub-10 e Sub-12; ás 11.15 horas, os Sub-14 e Sub-16; e ás 11.30 horas, o resto de categorías, entre elas Sub-18, Sub-20, Sub-23, Sénior e Máster.
Prohibición de estacionar
Para garantir o bo desenvolvemento da carreira, varias zonas deberán quedar totalmente libres de vehículos estacionados. Na Praza da Lexión non se poderá aparcar en toda a súa contorna, tanto na zona dos edificios como no acceso ao CIFP María de Europa e nas interseccións coas rúas do Xílgaro e Fernández Alonso. A rúa do Xílgaro terá prohibición total de estacionamento, do mesmo xeito que o tramo inicial da rúa Castelo Ramiro, onde ademais se habilitará un dobre sentido de circulación delimitado con conos para facilitar o tránsito durante esas horas.
Desvíos previstos
En canto aos desvíos, o tráfico da rúa Castelo Ramiro en sentido ascendente redirixirase á altura da rúa Filomena Dato, mentres que en sentido descendente o desvío producirase á altura do camiño do Curandeiro. En Couto Berredo, a circulación desviarase á altura da N-525. Pola súa banda, a rúa do Salto do Can permanecerá pechada á altura da rúa da Rula, polo que os vehículos deberán tomar previamente a rampa de Sás-Francisco Asorey.
Dende o Concello pedíuse a colaboración tanto dos veciños como dos condutores para que respecten a sinalización instalada de forma puntual e sigan os itinerarios alternativos habilitados.
Cambios no autobús urbano
O servizo de autobuses urbanos tamén se verá afectado durante o evento. Dende as 10.30 horas e ata que remate a carreira, a liña 10, que cobre o traxecto 'Cabeza de Vaca – Velle', modificará o seu percorrido en ambos os sentidos, pasando polas rúas Cabeza de Vaca, Tangaraño e Marcelo Macías.