A Xunta e a UVigo ultiman o impulso do Campus Auga como campus especializado

OurenseXa
O secretario xeral de Universidades e os responsables do campus avalían as accións que se formalizarán nun convenio a través do cal o Goberno galego investirá máis de 3 millóns de euros
campus_ourense_archivo
Campus de Ourense
20 may 2024

A Xunta de Galicia e a Universidade de Vigo (UVigo) ultiman as primeiras actuacións de impulso do Campus Auga de Ourense como campus especializado.

O secretario xeral de Universidades, José Alberto Díez, mantivo hoxe unha reunión de traballo co vicerreitor do Campus de Ourense, Francisco Javier Rodríguez, co director do Campus Auga, Roberto Fernández, e co xestor, Roberto Villar, para avaliar o desenvolvemento de accións específicas que se recollerán no convenio a través do cal o Goberno galego inxectará máis de 3 millóns de euros para levalas a cabo.

Na xuntanza abordáronse cuestións relativas á docencia enfocadas a potenciar a oferta formativa, a empregabilidade e a internacionalización; á investigación para fortalecer a captación de talento; á transferencia e innovación e á gobernanza.

Cómpre lembrar que o Campus Auga de Ourense vén de acadar acreditación como campus de especialización para o período 2024-2026, polo que é o terceiro campus do Sistema Universitario Galego que acada este recoñecemento, tras o Industrial de Ferrol e o Campus Terra de Lugo. Isto, na práctica, supón contar cun financiamento específico por parte da Xunta de Galicia que superará os 3 millóns de euros para dito período. Esta contía sumarase aos case 8,5 millóns que leva investido o Goberno autonómico desde que arrancou o proxecto en 2013.