A Xunta licita por preto de 13 millóns de euros o último treito da rolda leste de Ourense
O Consello da Xunta autorizou este luns a licitación das obras do último treito da rolda leste de Ourense, que unirá Bemposta coa estrada N-525, cun orzamento de 12,7 millóns de euros.
A actuación permitirá construír unha nova estrada de 1,5 quilómetros de lonxitude que discorrerá polos concellos de Ourense e San Cibrao das Viñas, beneficiando a unha poboación de 110.609 habitantes. Os traballos terán un prazo de execución de 30 meses.
O novo viario partirá da glorieta existente na confluencia das estradas OU-105 e OU-510, en Bemposta, e avanzará en dirección suroeste ata conectar coa nova glorieta que enlazará coa N-525, a OU-525 e a autovía A-52.
Segundo as previsións da Xunta, as obras licitaranse durante este mes de xullo e serán adxudicadas ao longo do segundo semestre do ano, co obxectivo de iniciar a súa execución no primeiro trimestre de 2027.
Con esta actuación completarase a circunvalación perimetral da cidade de Ourense prevista no Plan sectorial viario de Ourense e a súa contorna. Ademais, a nova infraestrutura permitirá reducir de forma considerable os tempos de desprazamento ata a A-52, xa que o percorrido entre Bemposta e a N-525 pasará dos actuais sete minutos e 4,6 quilómetros a pouco máis dun minuto e 1,7 quilómetros.
A Xunta destaca tamén que o proxecto contribuirá a mellorar a seguridade viaria e a desconxestionar o tráfico no centro da cidade, ao desviar circulación de vías como Marcelo Macías ou a avenida de Zamora.
O treito contará con dous carrís de circulación, un por sentido, de 3,5 metros de ancho, ademais de beiravías de 1,50 metros. Nas zonas con maior pendente habilitarase un carril adicional para facilitar a circulación.
O trazado require a execución de varias estruturas singulares, entre elas un paso inferior no cruzamento coa liña ferroviaria de ADIF, un viaduto de 80 metros sobre o río Barbaña e un paso superior que permitirá o acceso á estación depuradora de augas residuais (EDAR) de San Cibrao.
O proxecto inclúe tamén a remodelación dos accesos á glorieta desde a N-525 e a OU-525 mediante a construción de dous novos ramais. O ramal sur partirá da OU-525 a través dun carril de deceleración, mentres que o ramal norte conectará a glorieta existente coa N-525, enlazando co carril adicional que dá acceso a Expourense.
Nos primeiros 400 metros o trazado discorrerá sobre terraplén e continuará posteriormente en desmonte, condicionado pola proximidade da liña ferroviaria de ADIF. A partir do punto quilométrico 1+220 cruzará o río Barbaña e conectará directamente coa glorieta existente na N-525, que non será modificada.