Allariz celebrará o 4 de outubro a súa cuarta proba de BTT con dous percorridos de 45 e 25 quilómetros
Allariz prepárase para vivir unha nova xornada de ciclismo de montaña coa celebración da cuarta edición da súa proba de BTT, que terá lugar o domingo 4 de outubro. O anuncio desta nova convocatoria realizouse nun acto de presentación no que participaron representantes dos clubs Asocial e CC Allariz, xunto co coordinador deportivo municipal, Roberto Naranjo, e o concelleiro de Deportes, Carlos Puga.
A iniciativa ten como obxectivo impulsar a práctica deportiva e o gozo da contorna natural do municipio, poñendo á disposición das persoas participantes dous itinerarios diferentes segundo a súa condición física: un longo, de 45 quilómetros, e outro máis curto, de 25 quilómetros. Ambos os percorridos partirán de xeito conxunto ás 09.30 horas desde a Alameda, a carón do Boi de Pedra.
Quen desexe sumarse a esta cita xa pode formalizar a súa inscrición a través da plataforma Sportmaniacs ou mediante a aplicación Saudeter. A organización previu puntos de avituallamento ao longo do trazado, así como agasallos para as persoas participantes.
En canto á recollida de dorsais, establecéronse dúas quendas: o sábado 3 de outubro, de 09.00 a 13.00 horas, na Piscina Municipal do Complexo Vilanova; e o propio domingo 4 de outubro, de 08.00 a 09.00 horas, na zona de saída da Alameda. Para retirar o dorsal será necesario presentar o DNI ou unha fotocopia, outro documento identificativo válido ou o xustificante de inscrición. A organización lembra que non se admitirán devolucións unha vez confirmada a praza.
A proba está organizada polo Concello xunto cos clubs Asocial e CC Allariz, e conta coa colaboración da Deputación de Ourense, Deporte Galego, Apersa e Atmósfera Sport Allariz, ademais do apoio da agrupación de Protección Civil.