Allariz prepárase para acoller o Campionato Galego de Apnea Indoor 2024
O próximo domingo 5 de maio, a Piscina Municipal de Allariz, situada no Complexo Deportivo de Vilanova, será o epicentro do Campionato Galego de Apnea Indoor 2024 (Open), organizado polo Club Pérez Sub. A proba dará comezo ás 09:30h da mañá e dende a organización estiman que durará ata ás 14:30 horas.
Durante a mañá de hoxe, as instalacións municipais foron o escenario da presentación oficial deste esperado evento, coa destacada presenza da alcaldesa de Allariz, Cristina Cid, o concelleiro de Deportes Juan Carlos Puga, así como o presidente e o secretario do Club Pérez Sub, Jose Luis Peso e Rafael Fernández. Ademais, contouse coa presenza de Lalo González de +Deporte La Región e Telemiño como colaboradores.
A apnea, unha das especialidades menos coñecidas pero máis desafiantes dos deportes subacuáticos, será a protagonista indiscutible desta competición. Anualmente, as principais figuras desta disciplina reúnense en Galicia para os campionatos galegos, e este ano Allariz foi seleccionada como a sede para este emocionante desafío.
A apnea, que implica mergullarse na auga e conter a respiración, é considerada unha actividade deportiva extrema. As modalidades varían desde a estática (sen desprazamento) ata a dinámica (realizando desprazamentos), e esta competición incluirá tanto categorías femininas como masculinas.
En Galicia, a práctica da apnea está estreitamente ligada á pesca submarina e conta con máis de dúas décadas de historia. Como destacaron o presidente e o secretario do Club Pérez Sub durante a presentación, a apnea non se limita exclusivamente ás zonas costeiras, e Allariz ofrece un entorno magnífico para a súa práctica.
Esperase a participación de destacadas figuras deste deporte tanto a nivel autonómico, estatal e internacional, que buscarán superar as marcas establecidas na edición anterior. Cabe destacar a presenza de deportistas que compiten xa a nivel internacional en campionatos como poden ser os Xogos Olímpicos.
Entre os logros destacados do ano pasado, a deportista Lorena Prieto Cacabelos do Club Sotavento, de Sanxenxo, estableceu novos récords autonómicos nas modalidades de DNF Feminina (90,86m), DBF Feminina (129,7m) e DYN Feminina (130,02m).