Arranca a xornada de folga xeral cos turnos de noite parados nas grandes empresas e algúns altercados
A folga xeral convocada este 11 de novembro tivo un amplo seguimento en Galicia, con polígonos industriais baixo mínimos, transporte público reducido e importantes paros en cidades como Vigo e A Coruña. O consumo eléctrico caeu máis dun 12 %.
Ás 00:00 horas arrincou a xornada de folga xeral convocadas polos sindicatos CIG, UXT, CCOO e CNT. Unha xornada de paro e mobilizacións contra "a carestía da vida e para exixir medidas para frear a escalada imparábel dos prezos dos produtos básicos, da vivenda, a precariedade, a pobreza laboral e a deterioración dos servizos públicos".
Co inicio da folga saíron os piquetes en numerosas cidades e vilas, en moitos casos tras celebrar asembleas para perfilar os últimos detalles dunha xornada que será longa, cara os polígonos industriais, fábricas e servizos con quenda de noite.
A xornada contou cun importante seguimento en sectores estratéxicos e tamén moi sindicalizados, como a automoción e o naval pero tamén con incidentes. Noutros sectores o seguimento está cualificado de "relevante", como o transporte e a recollida de lixo", onde se están a cumprir os servizos mínimos. Na industria o seguimento está preto do 70 % con fábricas "paralizadas na súa práctica totalidade".
No transporte o seguimento está sendo moi elevado, preto do 80 % por estrada, sendo do 100 % en Monbús, segundo CC. OO. Tamén suspenderon varios voos nos aeroportos de Santiago e Vigo e con repercusións no ferrocarril.
Si hai tranquilidade nos xulgados, onde todo transcorre con normalidade, coa celebración habitual de vistas segundo a axenda.
A folga estendeuse tamén polo estudantes, coas facultades da USC pechadas e algunhas con estudantes como piquetes informativos e animando a participar nas diferentes concentracións.
No Sergas a falta de ampliar os datos, confirman suspensións de quirófanos nos hospitais da Coruña, Cee e Monforte, mentres que en Ferrol tiveron que ser todos ser suspendidos. Tamén en Ferrol se confirma unha incidencia da folga en Primaria está sendo alta. No conxunto dos hospitais estanse vendo afectadas tamén, ademais dos quirófanos, as consultas programadas.
As primeiras manifestacións comezaron con normalidade.
POR LOCALIDADES
En Vigo, na farmacéutica Cofano, xa non entrou a quenda de noite, tamén está parada ao 100% FCC, que xestiona a recollida de lixo e a limpeza viaria da cidade. En BorgWarner Zamans na quenda de noite, dun total de 152 persoas só entraron 3 encargados e 8 persoas taller e na planta de Pescanova de Chapela só entrou unha parte do persoal.
Practicamente todas as empresas do sector da automoción tanto de Vigo como de Porriño están paradas, así como a empresa de loxística e transporte de mercadorías STEF.
Na cidade da Coruña, o paro tamén está a ter un importante impacto nos servizos públicos e na actividade económica. O servizo de recollida do lixo do Consorcio das Mariñas, que inclúe todos os concellos da área metropolitana —agás A Coruña e Arteixo—, está parado, do mesmo xeito que o servizo municipal de recollida de residuos. No porto, a actividade atópase practicamente paralizada, segundo os sindicatos, mentres que no almacén de Zara Loxística o seguimento está a ser significativo desde a quenda de noite.
As primeiras horas da xornada estiveron marcadas polos piquetes nas cocheras da Compañía de Tranvías, nos Rosales, onde se viviron momentos de tensión durante a intervención policial para permitir a saída dos autobuses dos servizos mínimos. Tamén houbo incidencias nos polígonos da Grela e Sabón, así como cortes puntuais de tráfico en Alfonso Molina. No centro, numerosos comercios permaneceron pechados durante a mañá e miles de persoas participaron nas manifestacións convocadas pola CIG, CCOO e UGT.
En Ferrol, a folga tamén tivo un seguimento moi elevado desde a quenda de noite. O persoal de Navantia non entrou traballar e a actividade nos estaleiros de Ferrol e Fene quedou practicamente paralizada, do mesmo xeito que boa parte da industria auxiliar. En Narón, o servizo de limpeza nocturna tampouco saíu e en Ferrol unicamente están a funcionar os servizos mínimos de recollida de residuos.
Os piquetes percorreron distintos puntos da comarca, con presenza nos polígonos industriais de Río do Pozo, en Narón, e Vilar do Colo, entre Fene e Cabanas. Tamén houbo mobilizacións no Alcampo de Narón, onde se rexistrou presenza policial. A xornada estivo acompañada de manifestacións sindicais no centro de Ferrol e dunha importante resposta no sector naval e nos servizos.
En Lugo tamén funcionan unicamente os servizos mínimos no servizo de recollida do lixo. E a única cuestión salientable foi a "desproporcionada" actuación tanto da Policía Nacional, como da Policía Local no piquete de Ecolugo, onde identificaron a varias persoas "sen razón algunha", como explicou a CIG.
Tamén se rexistraron momentos de tensión á entrada do Centro Comercial As Termas, cando non deixaron entrar a todos os piquetes a algunha das tendas.
Na Mariña, a xornada de paro tivo tamén unha importante expresión nas rúas. Burela acolleu unha das principais mobilizacións da comarca, cunha manifestación convocada pola CIG que reuniu arredor de 3.000 persoas, segundo os datos facilitados pola organización. A protesta contou co apoio do BNG e de colectivos sociais como a Plataforma en Defensa da Sanidade Pública da Mariña. Pola súa banda, en Viveiro estaba prevista outra marcha ás 12.00 horas, promovida por CC.OO. e UGT.
A folga tamén tivo repercusión no ámbito industrial e noutros sectores produtivos da comarca. En Alcoa, en San Cibrao, os traballadores iniciaron o paro xa na quenda nocturna e a actividade nas plantas de aluminio e alúmina mantívose baixo servizos mínimos.
En Pontevedra o seguimento é total na quenda de noite de Treves e do servizo de recollida de residuos sólidos urbanos non saíu nin a quenda de noite, nin os servizos mínimos.
No polígono do Campillo, un sindicalistas resultou ferido ao ser atropelado por un condutor cando estaba como piquete informativo.
En Ourense, a xornada estivo marcada pola choiva e polo festivo local de San Martiño. Segundo a CIG, a quenda de noite de Rubí Automotive, en Ribadavia, secundou case por completo o paro, e as mobilizacións da mañá na capital reuniron a centos de persoas. O Concello fixou un servizo mínimo de 16 autobuses urbanos, e a área sanitaria rexistrou o menor seguimento de Galicia en Atención Primaria, un 3,05% na quenda de mañá. Ás 18.00 horas hai convocada unha concentración pola vivenda ante a Subdelegación do Goberno, no parque de San Lázaro, tras a que celebrou Alianza pola Vivenda no mesmo lugar a véspera.
MANIFESTACIÓNS
UGT e CC.OO. convocaron manifestacións durante a mañá deste mércores, 11 de novembro, con motivo da xornada de folga xeral, nas sete cidades galegas e noutras localidades. Ademais, ambos os sindicatos animan a participar nas mobilizacións previstas para a tarde, organizadas por outras centrais sindicais e colectivos sociais.
Pola súa banda, a Plataforma Galega Vivenda Xa! convocou e apoiou concentracións ás 18:00 horas nas catro capitais de provincia, así como en Ferrol, Santiago de Compostela e Vigo.
Miles de persoas participaron nas manifestacións celebradas en cidades e vilas galegas para reclamar mellores salarios, vivenda digna, control dos prezos e servizos públicos de calidade.
En Vigo, o secretario xeral de UGT-Galicia, Cristóbal Medeiros, defendeu a mobilización da clase traballadora e rexeitou os ataques aos sindicatos. «Se queren acabar con algo, que acaben coa precariedade, cos salarios que non chegan e cos alugueiros que non se poden pagar», afirmou.
As reivindicacións incluíron tamén a redución da xornada laboral, a mellora das pensións, a prevención de riscos laborais e o desbloqueo dos convenios colectivos.
Na mobilización participou o secretario xeral do PSdeG, José Ramón Gómez Besteiro, quen vinculou a folga coas eleccións do 29 de novembro e situou o debate entre a defensa dos dereitos e os recortes. Pola súa banda, o alcalde de Vigo, Abel Caballero, apoiou as demandas de mellora salarial e acceso á vivenda.
A portavoz nacional do BNG, Ana Pontón, chamou a trasladar a mobilización ás urnas o 29N cun apoio maioritario á súa formación, mentres denunciou a precariedade e a perda de poder adquisitivo.
Tamén a Fronte Ampla participou na convocatoria en Vigo. O seu portavoz, Paulo Carlos López, reclamou medidas contra a especulación inmobiliaria, como limitar os prezos dos alugueiros, regular as vivendas turísticas e ampliar o parque público.
A xornada rematou cunha mensaxe compartida polas organizacións participantes: defender os dereitos laborais, garantir o acceso a unha vivenda digna e mellorar as condicións de vida da maioría social.
.