Deportes

Os equipos benxamín, alevín e infantil do programa formativo disputaron os seus encontros, nunha iniciativa que xa cumpre catro anos afianzándose no medio rural

As Escolas Deportivas do Concello de Cea volveron medirse nesta fin de semana a rivais de localidades con maior poboación, dentro do seu programa de fútbol formativo dirixido ás categorías de base. A iniciativa, que xa acumula catro tempadas de percorrido, naceu cunha vocación humilde e foi gañando presenza nun contorno rural onde competir cada fin de semana fronte a escolas de concellos máis grandes supón, en si mesmo, un reto engadido.

Na categoría benxamín, o CD Cea impúxose por un contundente 9 a 1 fronte ao CDC Pereiro de Aguiar B. En alevín, o encontro entre o Rayo 21 CF C e o CD Cea rematou con vitoria para o equipo de Cea por 5 a 7. Por último, en infantil, e no marco dun partido de Copa, o CD Cea volveu impoñerse con claridade ao CDC Pereiro de Aguiar B, nesta ocasión por 1 a 8.

Dende a organización quíxose poñer en valor, máis alá do resultado puntual, o traballo desenvolvido tanto polos nenos e nenas participantes como polos adestradores que pasaron polo proxecto ao longo destes catro anos, aos que se atribúe boa parte da mellora progresiva amosada por cada xogador e cada equipo. O recoñecemento esténdese tamén ás familias, por manteren o seu apoio a un modelo pensado a medio e longo prazo que, segundo se destaca, xa comeza a dar os seus froitos.

Nesa mesma liña, subliñouse que o obxectivo principal das Escolas Deportivas non é tanto o resultado deportivo como que os nenos e nenas gocen do deporte mentres interiorizan valores e hábitos de vida saudables.

A iniciativa, enmarcada na campaña 'Actívate en positivo', conta coa colaboración e organización da Deputación de Ourense e o Concello de San Cristovo de Cea.