As obras de mellora da rúa do Progreso obrigarán a cortar o tráfico por tramos durante unha semana
A execución das obras de asfaltado, pavimentación e acondicionamento integral da calzada da rúa do Progreso de Ourense obrigará a aplicar medidas especiais de regulación do tráfico desde o luns 13 ata o domingo 19 de xullo.
A actuación, que será realizada pola Xunta de Galicia, require a presenza de maquinaria pesada e intervención directa sobre a superficie de rodadura, polo que a circulación de vehículos quedará totalmente suspendida cada día nos tramos afectados polos traballos.
A Policía Local do Concello de Ourense estableceu un calendario de cortes progresivos segundo o avance da obra. O primeiro deles terá lugar o luns 13 de xullo, a partir das 06.00 horas, cando se interromperá o tráfico no tramo comprendido entre a praza de Concepción Arenal e a glorieta de San Rosendo (Concordia).
O martes 14 de xullo, tamén desde as 06.00 horas, o corte afectará ao tramo situado entre a glorieta de San Rosendo e a rúa Parada Justel.
Nas fases posteriores da actuación executaranse os traballos de pavimentación no tramo comprendido entre a baixada á praza de Abastos e a intersección coa rúa da Coruña e a avenida de Zamora.
Ademais, durante o período das obras quedará inhabilitado de maneira ininterrompida o uso dos accesos e saídas das cocheiras e dos vaos particulares situados no perímetro afectado. Estas restricións manteranse ata a finalización das actuacións previstas na vía pública.
A Policía Local será a encargada de coordinar o dispositivo de seguridade viaria durante o desenvolvemento dos traballos. Para iso, colocará valado perimetral, instalará a sinalización circunstancial obrigatoria e supervisará o funcionamento do dispositivo durante toda a actuación.
Desde a dirección técnica da obra sinalan que estas medidas son necesarias para cumprir coa normativa de prevención de riscos laborais e garantir a seguridade tanto dos operarios como das persoas usuarias da vía.
O acceso prioritario para vehículos de emerxencias e servizos esenciais quedará garantido no caso de ser necesario.
O Concello solicita a colaboración da cidadanía e recomenda aos condutores que planifiquen os seus desprazamentos con antelación e empreguen vías alternativas debidamente sinalizadas. Tamén pide extremar a precaución e respectar as indicacións dos sinalistas da obra.
O corte de tráfico previsto para o luns 13 de xullo afectará aos percorridos de tres liñas do servizo de autobuses urbanos.
As modificacións afectarán á liña número 4, Eirasvedras-antiga estación de autobús-Seixalbo, unicamente en sentido Seixalbo; á liña número 5, Reza-Ceboliño, só en sentido Ceboliño; e á liña número 6, “Antiga estación de autobús-As Curuxeiras”, unicamente en sentido As Curuxeiras.
O martes 14 de xullo, segundo informa o Concello, os percorridos das liñas de autobús urbano non sufrirán modificacións.