As obras na rúa Emilia Pardo Bazán obrigarán a despregar un dispositivo especial de tráfico este xoves en Ourense
O Concello de Ourense porá en marcha este xoves, 9 de xullo, un dispositivo especial de tráfico con motivo das obras de pavimentación e acondicionamento integral que a Xunta de Galicia executará na rúa Emilia Pardo Bazán. O operativo, coordinado pola área de Seguridade Cidadá e Tráfico, iniciarase ás 6.00 horas.
A actuación desenvolverase ao longo de toda a vía, desde a súa conexión coa avenida de Buenos Aires ata a intersección coa estrada da Granxa, onde se renovará o firme da calzada.
Segundo a planificación prevista para a obra, a intención é conservar a circulación nos dous sentidos durante os traballos sempre que as condicións de seguridade o permitan. Con todo, a utilización de maquinaria pesada e os labores de estendido do novo pavimento poderán facer necesario establecer restricións temporais ao tráfico ou mesmo cortes completos nalgúns momentos da intervención.
A Policía Local encargarase de supervisar o operativo, controlar a circulación e comprobar que a sinalización provisional estea correctamente instalada. Tamén actuará para facilitar a mobilidade nos períodos de maior intensidade de tráfico.
O dispositivo prevé manter en todo momento o acceso dos vehículos de emerxencias e dos servizos públicos esenciais, co obxectivo de garantir a prestación destes servizos durante a execución das obras.
Desde o Concello solicítase a colaboración da cidadanía durante o desenvolvemento dos traballos. Recoméndase circular con especial precaución, adaptar a velocidade á sinalización provisional e, sempre que sexa posible, utilizar itinerarios alternativos para reducir as retencións que poidan producirse.