As socialistas de Ourense sacan adiante dúas mocións para revitalizar o comercio e impulsar a igualdade institucional
O Pleno do Concello de Ourense aprobou este xoves dúas mocións presentadas polo grupo municipal socialista centradas na dinamización económica dos barrios e no avance cara a unha maior igualdade na representación institucional.
As propostas foron defendidas pola voceira socialista, Natalia González Benéitez, e pola edil María Fernández Ojea, e saíron adiante tras o debate plenario, segundo informou o grupo municipal.
A primeira das iniciativas aprobadas propón a posta en marcha da estratexia “Ourense Cidade Viva”, un plan integral orientado á revitalización urbana, ao impulso do comercio de proximidade e á dinamización dos barrios da cidade. O proxecto pretende servir como folla de ruta para os próximos anos ante a preocupación pola perda de actividade comercial, o incremento de baixos baleiros e a necesidade de recuperar espazos públicos máis activos.
Entre os acordos aprobados inclúese a elaboración da Estratexia Ourense Cidade Viva 2027-2035, coa participación de comerciantes, tecido empresarial, entidades veciñais, Universidade, organizacións sociais e culturais e expertos en planificación urbana. Tamén se contempla a creación dunha liña de axudas para a rehabilitación de baixos comerciais e a posta en marcha de alugueiros bonificados para facilitar a ocupación de locais sen actividade.
O PSdeG defende que a recuperación do comercio local debe abordarse de maneira integral, combinando políticas de dinamización dos barrios, mellora dos espazos públicos, apoio ao emprendemento e unha administración máis próxima á cidadanía.
A segunda moción aprobada, presentada pola edil María Fernández Ojea, céntrase na necesidade de avanzar na igualdade de xénero e na visibilización das mulleres na vida pública e institucional do municipio.
A iniciativa sinala que, a pesar dos avances normativos, continúa existindo unha infrarrepresentación feminina en actos públicos e espazos de visibilidade institucional, especialmente no ámbito deportivo.
Para facer fronte a esta situación, as socialistas propoñen a elaboración dun Informe Anual de Representación Institucional, a creación dun programa para dar visibilidade a referentes femininos de Ourense en distintos ámbitos como o deporte, a cultura, a empresa, a ciencia ou o asociacionismo, e o reforzo da Concellería de Igualdade mediante máis recursos humanos e económicos.
Desde o grupo municipal do PSdeG valoran positivamente a aprobación das dúas iniciativas e consideran que contribúen a construír unha cidade máis dinámica e inclusiva. Así mesmo, sinalan que agora corresponde ao goberno municipal desenvolver os acordos aprobados pola Corporación e dotalos dos medios necesarios para a súa execución.